Atualità
Jonta provinziela: de plu cuntribuc per l cuatier
USP – La Jonta provinziela de Bulsan uel purté inant i ponc fundamentei dla suvenzions de abitazion. Tres delibra iel bele unì auzà i mprësc' y i cuntribuc per l prim cuatier. Tla senteda de (ncuei) lunesc, 29 de setëmber iel nce unì tratà la lege nueva sun la scola y cuntribuc ai chemuns per mantenì la stredes.
Suvenzions de abitazion
Davia che la pruposta de lege n cont dla suvenzion nueves per l abitazion ne ie mo nia unida data pro dal Cunsëi provinziel, uel la Jonta mo te chësta legislatura pruté inant i ponc prinzipei. Imigrei da paejes nia europei dëssa permò do cin ani de residënza giapé la suvenzions de fit, per cumpré o frabiché n cuatier y per n cuatier dl Istitut de frabiché soziel. Fulestieres (nia europei) dëssa unì tëuc su te na graduatoria a pert. Per sustenì la families jëunes ulache tramedoi lëura, ulëssa la jonta che ti prim cin ani vëniel tëut n cunsciderazion l davani de tramedoi y pona fat la media. A chësta maniera giapa la families de plu ponc. Plu sustëni ulëssen dé a la categuria de davani mesana, che te truep caji ne giapa śën nia suvenzions.
N cont de mpresć per l frabiché à la jonta bele fat ora dé de plu. Persones singules o copies dëssa giapé 10% de plu, families nchin a doi mutons 20% de plu. Mo n majer aumënt vëniel dat a families cun trëi mutons (+33,3%), cater mutons (+25,8%) y plu de cater mutons (+27%). L cuntribut per l frabiché l cuatier da viver ie ënghe unì auzà y fej ora nchin a 45% dla soma mpresteda.
I autri feter 60 articuli dla riforma de suvenzions de abitazions unira tratei dal Cunsei provinziel nuef.
Lege Gelmini sun la scola
La Jonta provinziela à stlarì si posizion n cont dla lege statela nueva (137/2008) sun la scola. N ulëssa mantenì l sistem cun de plu nsenianc tla scola elementera y nia jì de reviers a n sëul nseniant sciche udù dant dal stat. L nseniamënt zivich vën bele fat tla Provinzia de Bulsan y nsci ne iel nia na nuvità. Nia a una ne ie la Jonta provinziela cun la notes a zifres da 1 a 10. Tl’elementera dëssel nce unì fat descrizions dl livel di sculeies, chësc se damanden a Bulsan nce per la mesana. “La valutazion de cumpurtamënt ne dëssa nia valëi per la media dla notes y per na valutazion de cumpurtamënt negativa ne dëssen nia suzeder che i sculeies ne passe nia tla proscima tlas” à dit l Presidënt dla provinzia. Ntan la proscima trëi enes iel udù dant n’ancunteda tl minister a Roma per purté inant la tratatives.
2,5 milon de Euro per stredes
Per mantenì la stredes ora di zëntri di luesc vëniel dat de ndut 2,5 milion de Euro ai chemuns. Sun 3.500 km de streda fejel ora na media de 714 Euro al chilometer.
Orar ustaries dan suneria de cassazion
La Jonta uel jì inant dan suneria de cassazion cun l stritoz per via dl orar dla ustaries. La Questura ova fat saré n local a Bulsan per via dl orden publich. La Jonta dij che l ie bele da 20 ani for stat si cumpetënza y che chësc argumënt zite muessa unì stlarì defin.
150.000 Euro per avëi abinà Ötzi
Cun la familia Simon iesen ruve a una de ti dé 150.000 Euro per avëi abinà Ötzi. L aucat dla familia à dit de vester a una cun la pruposta dla Jonta provinziela y śën possel unì njenià i cuntrac per pudëi finé via la cuestion. Tramedoi pertes paia si aucac.
Presidënt dl conservatorio
De trëi prupostes per l presidënt nuef dl Conservatorio de mujiga „Monteverdi“ a Bulsan à la Jonta cris ora Sergio Coletti che fova bele nchin śën presidënt. Per l cunsëi de gestion possa la Provinzia numiné una persona y tlo iel unì cris ora Jürgen Köllensberger.
Plazes dai auti pra l spedel
L priesc per lascé i auti pra l spedel de Bulsan ie unì smedrì da 1,80 Euro a 1,20 Euro al’ëura. Per l tëmp sëura la cater ëura paien 0,50 Euro. Chësc iel unì fat ora cun la sozietà a chëla che n ti ova sëurandat la gestion dla plazes dai auti. Te caji speziei sciche per ejëmpl pazienc de chemoterapia, o parënc de mëndri che muessa nstësc sté te spedel nsci sciche nvalic, ulenteres y chëi che vën a duné sanch dëssa pudëi lascé l auto debant. La Provinzia à per l prim ann udù dant 400.000 Euro che l ti vën data ala sozietà de gestion per curì l bilanz.
as
