Atualità
Puent a Runcadic: lëures a bon pont
USP – I lëures per fé da nuef l puent dl stradon de Gherdëina a Runcadic va inant drët bën. “Per Nadel nes à la firma Rella segurà de finé l puent nuef” spiega l assessëur ai lëures publics.
“Te duta la Provinzia de Bulsan iel unì fat 400 cuntroi n cont dla segurëza di puenc y aldò de chisc iel unì njenià n program di lëures per doi ani. L puent a Runcadic ova gran priorità”, nsci spiega l assessëur ai lëures publics l bujën chësc lëur. Ai primes de agost fovel unì scumencià a zaré ju l vedl puent y per mez dezëmber fejen cont de lascé passé l muvimënt di auti sun l puent nuef. Al chilometer 10,5 dla streda statela 242 iel unì metù su n puet de fier per ntant sun chël che n possa passé aldo de n semafer.
La firma Enrico Rella de Urtijëi ova pità n priesc de 14,5% plu bas dla soma proieteda y nsci ie l custimënt di lëures de 414.000 Euro. Fajan da nuef l puent vëniel nce fat a na maniera che sce l Derjon ëssa da mené truep material ne restel nia tacà. Chësc va dantaprima a bën dla segurëza de chëi che passa sun l puent. L schivé de chësc pericul se ova nce damandà i di respunsabli per l’eghes da mont.
Sun dumanda dl Cunsorz di Chemuns de Gherdëina y de Ciastel vëniel cun chisc lëures nce udù dant la lerch per fé passé la streda dala rodes.
as
