Atualità
L segondo tunel de S. Cristina ie tres
USP – Ncuei (16 de utober) da duman iel unì batù tres l ultim toch dl segondo tunel per la streda de zircunvalazion de S. Cristina. L mumënt aspità ert per via dla dificulteies geologiches a giavé chësc puent ie unì vissù n prejënza dl assessëur ai lëures publics, ambolc y tecnics. Duman vënderdi uniral metù i trames dl puent da Dorives.
Avëi batù tres l tunel Saslong de 375 metri fej śën sté plu saurì i respunsabli di lëures. Per chësc tunel ne iel unì giavà tl crëp, ma scialdi te giara y mauta. L fova nsci daniëura pericul che vel pert pudëssa dé do. “La segurëza à te chësc lëur la majera mpurtanza y ne on a deguna maniera ulù ti fé prëscia ai lauranc” sorissea l assessëur ai lëures publics. “De gra ala firmes che à laurà cun gran prufesciunalità sons tres, y śën puderà i lëures jì inant cun plu gheneda.”
Tl raion ulache passa nce l purtoi dai schi y la furnadoia fovel da vedlamënter unì ju na gran smueia. Te chësc material an messé giavé tunel. Per garantì segurëza an furà ite plu iedesc tl rone per lascé ora l’ega. Deditora an man man che l ie unì giavà inant, segurà l tunel cun peton sprizà. Mplu iel cun n sistem de monitoring unì cialà do avisa sce l raion ntëurvia ne debe nia do. Sëura l busc giavà ora iel me da 4 a 27 metri de fonz.
Per chësc tunel iel unì giavà ora 35.000 m³ de material che ie unì purtà a Puntives, a Blumau y pra la cava sun Jëuf de Sela.
Bele l ann passà d’auton oven njenià ca i portai dl tunel Saslong. I lëures à scumencià do la sajon da inviern y à durà cin’ mënsc. Nchin ala fin de nuvëmber uniral mo giavà ora l fonz y fat i parëies y la isolazion dediteora. Davia che tl fonz iel mpo mo vel pert de crëp, saral de bujën dl fé sauté doi iedesc al di. I colpes unirà stlupetei danter la 7 daduman y la 10 da sëira.
Duman vënderdi uniral metù i gran trames de fier per l puent danter l tunel Saslong y la raida de Dorives. Chisc à na lunghëza de 36 metri y vën metui a 10 metri da fonz.
La streda de zircunvalazion de S. Cristina cun de ndut doi tuniei y cater puenc, vën fata da trëi mprejes. La firmes Oberosler de Burnech, Marco Rella y Enrico Rella de Urtijëi à tenì ite l custimënt y i tëmps udui danora. Davia che l fova melsegur a giavé l tunel Saslong, an cun chësc lëur aspità che fine la sajon da inviern. N fej perchël cont de finé duta la streda de zircunvalazion de S. Cristina per l instà che vën.
as
