Atualità
Ncuei gëura l puent nuef a Corvara
USP – I lëures per fé da nuef l puent dla streda statela a Corvara ie jic inant tan bën che ncuei, lunesc (20 de utober) possel bel unì giaurì. Permez al puent da dant pieta l puent nuef plu lerch ai mesuns che passa, plu segurëza a chëi che va a pe y nce la lerch segureda per passé cun la roda. L assessëur provinziel ala stredes giaurirà l puent nuef ncuei dala trëi domesdì.
Sun na larghëza de ndut 7 metri possa l gran muvimënt di auti śën passé plu saurì y cun plu segurëza. L puent nuef sëura l Rü Tort a Corvara respetea n cunzet generel che dà nce lerch y segurëza a chëi che va a pe y cun la roda. Da tramedoi pertes iel unì fat n tretuar y leprò nce la lerch per la streda dala rodes. “Rengrazi veramënter l Chemun de Corvara per la bona culaburazion a fé chësc puent, na culaburazion che à judà a fine i lëures n mëns plu abenëura” sorissea l assessëur ala stredes.
I lëures fova bele unic scumencei de auril y à custà 1,2 milions de Euro. “Nce te chësc lëur iel unì tenì ite l custimënt udù danora” spiega l assessëur ladin cun sodesfazion.
Te chësc raion de Corvara iel truep muvimënt per via dla butëighes y ustaries, ma nce per arjonjer raions de paussa y la pistes dai schi. Pudëi garantì plu segurëza pra chësc puent à perchël mo na majera mpurtanza. L puent de 40 metri ie unì fat de peton. N cont dl cialé ora an respetà la bela cuntreda fajan l dlander de streda de lën. Sce chësc lëur ie garatà tan bën iel nce per merit dl diretëur dl ufize provinziel per la stredes de raion Gustav Misci de Longiarù cun si culaburadëur Marco Pinzan.
as
