Atualità
Sindacac y Presidënt dla Provinzia n cont dla crisa
USP – Miuré la forza de compra y seguré la stieres ie i obietives che i sindacac y la Provinzia de Bulsan uel arjonjer per ti tenì permez ala cunseguënzes dla crisa finanziera. Ncuei (22 de utober) se à ancuntà reprejentanc de cater sindacac y l Presidënt dla Provinzia de Bulsan.
Chësta ancunteda da ncuei ie stata l’ultima cunsultazion do la banches, fonds de pension, categuries economiches y jëuni.
I sindacac Sgb/Cisl, Uil/Sgk, Cgil/Agb, Asgb y la Provinzia ie ncuei riesc stai a una che tlo na nëus ne possen mo nia rujené de crisa, ma l ie bele da udëi danora tëmps melsegures. Un de chisc sënies ie i feter 3.000 posć de lëur tl Südtirol che taca adum cun la ndustria di auti che sënt dassënn la crisa.
Da pert dla Provinzia uelen dé da lëur cun programs speziei n cont de frabiché cuatieres y lëures publics. Pruvedimënc ie nce udui danora acioche i paiamënc vënie fai plu debota y che l sibe puscions a frabiché a desposizion. N cont di sparanies dla jënt ulël l’aministrazion provinziela dé garanzies sëuraprò y n cajo nce mprësć. L Presidënt dla Provinzia à segurà che l fonds de Pension regiuneles Pensplan ie segurà. Ël à nce rengrazià i sindacac che i ebe pudù se ancunté tan riesc. “Te chisc tëmps che deventerà melsegures, iel mpurtant ruvé a una per pudëi dé segurëza ai lauranc, ala families y ala firmes” à sorissà l presidënt dla Provinzia.
I sindacac se damanda dantaprima pruvedimënc fundamentei che la Provinzia à n pert bele udù danora: judé ciamp dl frabiché y di auti per dé na sburdla al’economia, atualisé i cuntrac coletives, fé 3.000 cuatieres dl istitut soziel IPES. Debujën iel aldò di sindacac nce de tenì cont dla categuries de davani mesan, che i chemuns porte inant i plans urbanistichs, furmazion tla rujenedes tudësc, talian y nglëisc, judé che l’umans posse inò zapé ite tl lëur, plu cuncurënza y cuntrol di priejes di prudoc dl Südtirol.
Per la pert soziela iel unì damandà de dé cuntribuc ai servijes prinzipei aldò dl avëi dla families y dl debujën, y nia do l prinzip de n puech per uni un. Da mëter a verda iel nce che l ne vënie nia laurà sota priesc. I assessëures provinziei ie bele tl lëur de mëter a jì programs speziei che possa scumencé prësc. N prim var cuncret unirà bele fat de nuvëmber cun la previjion dl bilanz 2009 y la lege finanziera che toca leprò.
as
