Atualità
Cherdeda ala veles dl Presidënt dla Provinzia
USP –Passa 387.000 litadëures tulerà n dumënia 26 de utober na decijion sun la cumposizion dl Cunsëi Provinziel nuef. L Presidënt dla Provinzia de Bulsan cherda ala veles: adurvëde vosc dërt de vela y dajëde testemunianza dl spirt democratich che caraterisea la populazion dla Provinzia de Bulsan. L Presidënt scrij:
„I litadëures dla Provinzia de Bulsan à daniëura demustrà n gran spirt de democrazia adurvan si dërt de vela. Nviei perchël mo n iede a testemunië chësc spirt jan a lité. Ti proscimi cin ani ti vëniel damandà al Cunsëi provinziel de fé fundamëntes per l daunì de nosta tiera y la Jonta provinziela numineda dla Cunsëi arà l duvier de se udëi ora la miëura streda che nes porta inant n cont dla politica, dl’economia, dl soziel y dla cultura te tëmps de decijions y mudazions mpurtantes.
Uni zitadin sà che jì a lité ie n sëni de maduranza y de gran respunsabltà persunela, ajache uni stima dà esprescion al ulëi purté pea la decijions per l daunì de nosta provinzia y de si autonomia.
Jan a lité, dà i litadëures na ncëria ai candidac y ala listes che chisc reprejentea: l litadëur dà esprescion de na posizion tlera, se detlarea per o contra zeche. Plu jënt che và a lité y plu sterscia che sarà la ncëria politica. La stima sëurandà al candidat cris ora l duvier de realisé la ntenzion y la cunvinzion di zitadins. Chi che ne va nia a lité lascia che i autri tole la decijions n cont dl daunì dla cumenanza te chëla che ël vif. Per chësta rejon nviei mo n iede duc canc: n dumënia ai 26 de utober, jon a lité y liton cun cuscienza.”
N video cun la cherdeda ala veles dl Presidënt dla Provinzia ie nce da udëi tl internet sota www.provincia.bz.it/usp (video online).
as
