Atualità
Nfurmazions per la veles provinzieles
USP – N dumënia 26 de utober ie 387 zitadins cherdei a lité da nuef l Cunsëi provinziel de Bulsan per i proscimi cin ani. Tla doi valedes ladines, Gherdëina y Badia, iel 15.070 litadëures. L vën lità n dumënia nchin ala 10 da sëira. La zedules unirà cumpededes l lunesc dala 7 da duman inant.
La listes che se prejënta ala valutazion di litadëures ie 15 (tl 2003 nen fovel 13), cun de ndut 471 candidac. De ndut iel 387.796 persones cherdedes a lité. Lité possa duc chëi che à abù 18 ani, che ie tla listes de vela (la data de referimënt ie l 2 de setëmber 2008), che ebe da cater ani ndolauter la residënza tla region Trentino-Südtirol y che ebe vivù la majera pert che chësc tëmp tla provinzia de Bulsan. Per lité muessen avëi pea la cherta de vela y n documënt. Chi che ne à nia plu la cherta, possa se n lascé fé na nueva ti ufizies de vela. Sun la zedula de lité iel l simbol de uni lista, per lité bastel fé na crëusc sun l simbol cris ora. N possa dé da una a cater stimes de preferënza scrijan l cuinuem dl candidat o scenó l numer sun lista. Acioche chësta stimes de preferënza vele, muessa i candidac vester dla lista che n à lità. N lunesc, 27 de utober vëniel giaurì n zënter stampa dla cësa provinziela Widmann a Bulsan, metù a jì dal Ufize stampa provinziel cun la culaburazion tecnica de autri ufizies provinziei. Tlo saral i studi per la trasmiscions televijives y radio dal vif. I jurnalisć puderà ti sté do ai resultac dla veles tres computer cun internet y da stampé. Nfurmazions sun la veles dl 26 de utober ie nce sota www.provincia.bz.it/elezioni tl internet.as
