Atualità
Lege nueva sun l frabiché alesirà va duman n drova
USP - La lege provinziela sun l frabiché alesirà che l Guviern provinziel à purtà inant y che ie jita tres tl’ultima senteda dl Cunsëi provinziel, jirà duman, mierculdi 5 de nuvëmber n drova. La reforma (lege dl 13 de utober 2008, nr 9) porta na lingia de nuviteies.
La prima nuvità dla lege nueva vëija dant i presuposć per n program de cuatieres soziei che dëssa unì metui da desposizion aldò dl fit provinziel. A Bulsan, per ejëmpl ie l fit provinziel de sies Euro al meter cuadrat.
La lege vëija nce dant che zitadins europeics che à n lëur canche i damanda n sustëni per l cuatier, vënie tratei ala medema cundizions sciche chëi da tlo. Da nuef iel che nce ëi muessa dé ju na detlarazion dla grupa de rujeneda che i uel fé pert.
Zitadins nia europeics muessa da moninla vester da almanco cin ani ndolauter tla Provinzia per pudëi fé dumanda. Ëi ne possa nia cumpedé adum tëmps plu curc che i à vivù tlo, ma sce i ie bele stai tla provinzia, vën chësc tëut n cunsciderazion per i ponc. Sëurapro muessa zitadins nia europeics mustré su che i à trëi ani ndolauter n lëur. L Guviern provinziel muessa uni ann dé dant tan de cuatieres soziei che vën metui a desposizion di zitadins nia europeics. Chësc vel nce per tan de scioldi che vën metui a desposizion per cuntribuc, frabiché, cumpré o fé su da nuef cuatieres.
Do che l ie unì tëut demez la cumiscion provinziela de cuntrol per l frabiché alesirà (Landesüberwachungskommission, LÜK), ie l cumité per l frabiché abitatif, la sëula istanza ulache l possa unì fat retlamazions. Nchina śën fovel danter l cumité, la cumiscion y la Jonta provinziel trëi luesc ulache n pudova fé retlamazions.
La reforma dl frabiché cumporta nce nuviteies per despartii y devurziei che pierd la rejon de sté tl cuatier. Ëi possa damandé n cuatier soziel o n cuntribut. Chësc vel nce tl cajo de chi che pierd l cuatier che muessa unì metù al lincant. Sce l dërt de puscion, de fit, de adurvé o de abité ti va al partner despartì o devurzià, pona an la puscibltà de giapé n nuef sustëni abitatif.
N sustëni particuler giapa la copies jëunes cun la lege nueva. Sce tramedoi ne ie nia plu vedli de 35 ani, lëura (amaca al 50%) y la noza ne ie nia stata da passa 5 ani, vëniel tëut n cusciderazion la soma di doi davanies, spartida per doi, per fé ora l cont dl sustëni abitatif. A uni maniera muessa l cuatier unì cumprà deberieda.
Da nuef ie nce la categuria plu auta de davani. La cuinta categuria tol ite n davani nchin a 50.000 Euro. Chi che ie te chësta categuria, giapa per cumpré, frabiché o fé ora da nuef si prim cuatier, n cuntribut de 20 percënt de si mprest abitatif. Chësc vel me sce l chemun à metù a desposizion grunt da frabiché nia alesirà. L sustëni per la categuria de davani plu auta ne vel nia sce l sustëni bel cunzedù vën spustà sun n cuatier fat su sun grunt alesirà.
Per la prima y segonda categuria de davani iel unì auzà la sëida de davani. La prima categuria tol ite davani nchin a 20.000 Euro, la segonda nchin a 27.000 Euro. Chësta spartizion dla categuries vel per dumandes che unirà dates ju do l prim de mei 2009.
as
