Atualità
Di dla porta davierta dla scoles autes a Urtijëi
USP – La trëi scoles autes a Urtijëi gëura n vënderdi ai 14 de nuvëmber si portes a duc i nteressei. L ie l prim iede che la Scola d’Ert, l Istitut Raetia y la Scola Prufesciunela prejënta deberieda si strutura y si atività. La sënta nueva dl Istitut Raetia y dla Scola Prufesciunela ie permò unida giaurida dan doi mënsc.
Genitores y sculeies che uel se crì ora na scola auta à pra l di dla prota davierta na bona ucajion de se fé n cheder de cie che vën pità tla trëi scoles autes a Urtijëi. Jan da una scola al autra possa uni un se fé n parëdl y nsci udëi sul mumënt te ciuna scola che l possa ti jì do l miec a si nteresc.
Tla defrënta tlasses vëniel n vënderdi ai 14 de nuvëmber pità n nseniamënt particuler, che possa vester de ntres per i vijitadëures. La strutura nueva, cun tlasses, tlasses spezieles y berstotes possa nce unì vijitedes cun prufessëures che spiega tla trëi rujenedes, ladin, tudësc y talian. Tl Istitut Raetia iel chëst ann 163 sculeies, tla Scola d’Ert nen iel 94 y tla Scola Prufesciunela per l artejanat artistich ntëur 40 sculeies.
I trëi diretëures, Karlheinz Mureda, Julius Senoner y Otto Moling nvieia duc i nteressei a passé sibe damesdi dala 8 ala 12 y nce domesdì dala 2 ala 5.
as
