Atualità
Guviern provinziel nuef: Durnwalder anconta reprejentanc ladins
USP – L Presidënt dla Provinzia Luis Drunwalder se à ncuei (13 de nuvëmber) ancuntà cun reprejentanc de rujeneda ladina per audì si prupostes n cont de furmazion y program per l Guviern provinziel nuef. L ie unì rujenà dl ruvé permez da pert di Ladins a ncëries, dl svilup dl nfurmazion ladina y dla nfrastrutures tla valedes ladines.
Deberieda cun l assessëur Florian Mussner à reprejentanc de rujeneda ladina, ncuei purtà dant prupostes al Presidënt dla Provinzia. Dal Guviern provinziel nuef se aspieten n prima linia cumprenscion per i bujëns dla mëndra grupa de rujeneda. Ncuei iel mplu nce unì damandà de fé na mudazion al statut de autonomia a na maniera che i Ladins ebe l mesun de ti ruvé permez a duta la ncëries. “N se nmagina che te n chësc cajo iel una dl’autra grupes de rujeneda che fej a manco de na si reprejentanza“, nsci l Presidënt. Nce tla cumiscion di sies y di dodesc, dëssel vester na reprejentanza ladina.
Tl ancunteda ie ncuei nce unì damandà de ngrandì la nfurmazion tla rujeneda ladina, te chëla che l ti vën dat de plu tëmp de trasmiscion ala RAI Ladina.
Na mpurtanza particulera dëssel unì dat al miuramënt dla nfrastrutures tla valedes ladines. “Cuncretamënter an tlo nunzià l ngrandimënt dl Museum ladin o dla scoles tla valedes” à dit Drunwalder do l’ancunteda.
Na posizion tlera iel nce unì purtà dant n cont dl assessëur ladin. L ie unì damandà che Florian Mussner vënie inò tëut ite tl Guviern, che l posse se tenì l dipartimënt y che l posse nce reprejenté i bujëns per i Ladins tl Guviern regiunel.
as
