Atualità
Bilanz y lege finanziera 2009 n drova
USP – N mierculdi che vën, 22 de auril va n drova l bilanz provinziel y la lege finanziera per l ann 2009. L di dant, merdi, unirà tramedoi leges provinzieles publichedes tla plata ufiziela dla region. Nsci ie l bilanz provinziel ufizialisà cun 5,424 miliardes de Euro. “L ie n bilanz valivà ora cun nvestizions per na miliarda de Euro” à dit l assessëur la finanzes Barbara Repetto.
Tla senteda de nuet dl cater de auril ova l Cunsëi provinziel dat pro la doi leges provinzieles. Per via dla veles provinzieles y la furmazion dl guviern nuef, possa la Provinzia chëst ann permò scumencé a lauré plu tert cun l bilanz. Tla plata ufiziela dla region uniral publicà la lege n referimënt al ann finanzier 2009 y l bilanz i trëi ani 2009-2011.
Te chësc bilanz iel udù dant 5,424 miliardes de Euro, chësc ie n puech de plu permez al 2008 canche n ova arjont 5,314 miliardes de Euro. Bën 905 milion de Euro vën adurvei per nvestizions y a chësta maniera “pruvedimënc che desmostra che son anjeniei ala sfides nueves che nes aspieta” dij l assessëura Repetto. De plu scioldi uniral chëst ann adurvà per l personal ulache l ie stat n aumënt de 50 milion de Euro per respeté i cuntrac coletives nueves. L capitul dla furmazion ie unì auzà de 50 milion de Euro y mplu nce chël dl frabiché cuatieres per la categuries de davani mesan, la cures y la mubilità.
as
