Atualità
Njenieres de Persenon y dal Austria à abù la miëur idea per Sëlva
USP- I njenieres dl studio EUT de Persenon, l studio Bergmeister de Neustift y la “ILF Beratende Ingenieure” dal’Austria à venciù l cuncors de ideies per na streda de zircunvalazion de Sëlva. Si pruposta ie unida valuteda da na cumiscion sciche la miëura y plu realisticia danter 25 ideies mandedes ite. L’Assessorat provinziel per la stredes meterà a jì na mostra per lascé udëi duta la ideies mandedes che à fat pea l cuncors.
L’idea che à venciù l cuncors provinziel y che pieta na bona soluzion al problem dl muvimënt sun streda tl luech Sëlva, ti semea dassënn ala zircunvalazion de S.Cristina: doi de majeri tuniei sun la pert da dumbria dla valeda y tamez n culegamënt per ruvé diretamënter tl zënter. L’idea dla grupa de njenieres EUT, Bergmeister y ILF vëija dant na streda de zircunvalazion sun na lunghëza de 2.970 metri. Dedite dal raion La Poza unissel fat n rundel y pona n puent per ruvé dal autra pert de ruf. Da tlo scumëncia aldò dla pruposta l prim tunel sun na lunghëza de 535 metri nchin dedite dala Cësa de cultura Oswald von Wolkenstein. Tlo iel udù dant n culegamënt per furné diretamënter l zënter de Sëlva. L studi de fatibilità vëija dant n segondo tunel de 730 metri che mëina nchin dedite dal zënter dal tennis y pona mo n rundel per ruvé ite tla streda de Plan. La streda per jì sun i jëufs unissa spusteda do ruf ite cun n culegamënt ala prima raida riesc sëura l raion artejanel. De ndut iel cin puenc, l plu lonch mesura 71,5 metri.
Sëuraprò ala zircunvalazion dl luech vëija l studi de fatibiltà nce dant n miëur culegamënt per l raion La Sëlva. Dan ruvé do la streda da śën tl zënter de Sëlva, vëija l studi dant n puent sëura l ruf de Gherdëina y culeghé a chësta maniera la streda che porta ora la Sëlva. L studi de fatibilità che à venciù l cuncors de ideies vëija dant n custimënt de 30,8 milion de Euro.
L segondo plazamënt dl cuncors ti ie jit ala pruposta de fé n tunel plu lonch sun na lunghëza de 1.563 metri. Chësc tunel sëul scumencëssa y finëssa te feter tla medema lueges sciche pra l idea che à venciù. T'amez iel la puscibltà de unì ora tl zënter. La pruposta ie unida mandeda ite da la grupa de njenieres de Bulsan y dl’Austria.
Sciche terza miëur idea à la cumiscion valutà l studi che vëija dant na zircunvalazion cun cater tuniei y n culegamënt cun l zënter ti raion dla stazion dla furnadoia de Ciampinëi. Chësta idea ie unida da Rodolfo Senoner y Thomas Demetz.
L nteres per l cuncors de ideies per la zircunvalazion de Sëlva ie stat grant. 52 njenieres fova unic a se tò la documentazions y 25 à nce dat ju n studi de fatibilità. “Duta chësta ideies unirà metudes ora te na mostra te Sëlva” à dit l assessëur provinziel Florian Mussner.
La rejons prinzipeles che ti à fat vëncer la pruposta cun doi tuniei y de ndut 5 puenc ie danterauter l bon cunliamënt per arjonjer l zënter dl luech y la trupa plazes da lascé l auto.
La giuria ie unida metuda adum da doi reprejentanc dla repartizion provinziela per la stredes (ing. Valentino Pagani y ing. Maurizio Mazagg), na reprejentanta dl’Ufize provinziel per urbanistica (Virna Bussadori), dla cumiscion per l mpat ambientel (Adriano Oggiano), doi tecnics externes (ing. Walter Pardatscher y l arch. Carlo Azzolini) y l ambolt de Sëlva Roland Demetz.
as
