Atualità
Butëighes daviertes da sëira nce te Gherdëina
USP – 29 chemuns dla Provinzia de Bulsan pieta nce ntan chësc instà la butëighes daviertes da sëira. Te Gherdëina vëniel ai 20 de lugio metù man cun l “shopping” da sëira. Cun la butëighes daviertes ntan doi sëires al’ena devënta i zëntri di luesc ponc de ancunteda per i zitadins. L Dipartimënt provinziel per l’economia sustën chësta scumenciadiva.
„La butëighes daviertes da sëira ti dà n majer valor ai zëntri” sorissea l assessëur provinziel Thomas Widman y l presidënt la dla lia di marcadënc HDS Walter Amort. Per chësta rejon vëniel deberieda sustenì la scumenciadiva.
Urtijëi ie l prim di trëi luesc de Gherdëina che scumëncia cun l’azion: dai 15 de lugio nchin ai 28 de agost vën la butëighes de mierculdi y vënderdi nce giaurides da sëira. De lugio vel chësc danter la 21.00 nchin la 22.30, de agost vëniel slungià l tëmp de giaurida nchin a mesanuet, pitan nce n program de spetaculi.
N lunesc ai 20 de lugio vëniel pona metù man a S. Crestina cun la butëighes daviertes da sëira. De lunesc y juebia vën la butëighes tlo bele giaurides dala 20.30 nchin la 22.30. Cun la streda de zircunvalazion nueva ie chësta scumenciadiva un di prim vares per fé madurì n raion da jì a pe sun la streda Dursan. L’azion jirà inant nchin ai 27 de agost.
Te Sëlva gëura la butëighes de merdi y vënderdi danter la 21.00 y la 22.30. Tlo scumëncia l’azion ai 21 de lugio y unirà tenida avisa n mëns, nchin ai 21 de agost. Permez al ann passà iel ti trëi luesc de Gherdëina unì mantenì i medemi dis.
“L ie mpurtant che l vën dat n majer valor ai zëntri cun azions y programs che à l fin de mantenì la vela de butëighes daujin ala cëses, de ti dé vita ai luesc a na maniera che i se mantën atratives da viver” dij la assessëur Widmann. La butëighes daviertes da sëira ntan l instà ie n model drët garatà de culaburazion danter cumerz, manco muvimënt di auti y l tré ite de plu ciamps economics sciche artejanat, gastronomia y turism. De chësc vieres lëura nce l’aministrazion provinziela che à da permò dat pro linies nueves per ti dé plu valor al cumerz di luesc.
La sëires cun la butëighes daviertes pieta nce ucajion de se ancunté y de scumenciadives sëuraprò ti luesc. La lista de duc i 29 luesc dl Südtirol che pieta l “shopping da sëira” ie publicheda tl internet sun la plates dla lia di buteghieres www.hds-bz.it y nce sun la plates provinzieles www.provinz.bz.it/wirtschaft/4622.asp
as
