Atualità

Politica | 17.11.2009 | 11:14

L Dalai Lama anconta la Jonta provinziela: autonomia y aiuc

USP – L Dalai Lama, la ncëira plu auta di budisc’ tibetians à ncuei (17 nuvëmber) ancuntà l presidënt dla Provinzia Durnwalder y pona nce duta la Jonta provinziela. Tl’ancunteda cun la stampa al mustrà gran recunescënza per la sensibltà y l sustëni da plu pertes tla Provinzia de Bulsan per si popul. “La China ie tl lëur de se mudé y n’autonomia sciche a Bulsan fossa per nëus na bona soluzion” à dit l Dalai Lama.

“Son n gran apasciuna dl’Autonomia tlo a Bulsan y perchël vëni gën a udëi co che la se svilupea” à dit Tenzin Gyatso, l 14esim Dalai Lama. La China ie tl lëur de se mudé. Vëiji che l se slergia n trend danter la populazion cineja che uel plu democrazia y n se giaurì. È respet per la China, ma la China ne puderà nia for se stlù a chësc trend de si jënt. “I stac dl mond à la respunsabltà de purté la China sun chësc troi” à dit l Dalai Lama ncuei tl Palé Widmann, per l terzo iede a Bulsan.

Tl’ancunteda cun la Jonta provinziela iel unì sotscrì n’acurdanza te chëla che la Provinzia de Bulsan finanzieia 22 locai ulache i muciadives dl Tibet possa se ancunté te 22 luesc tl Nepal y tl’India. Chësta mëndra cëses dëssa nce unì nuzedes per ativiteies de lies, di jëuni y de grupes de zitadins. Tel vel un uniral nce anjenià ite na bibliotech. Ntan i proscimi trëi ani uniral spendù 337.000 Euro per chësc proiet.
Leprò à i assessëures provinziei nce scincà n cheder che dëssa lecurdé la Dolomites, patrimone Unesco. L Dalai Lama à pona nce purtà dant co che se svilupea la tratatives per l Tibet cun la China. “Nëus son n ejëmpl che nce na pitla mendranza possa se mantenì sce n se da ju cun mpëni” à dit l Presidënt dla Provinzia, danz che la situazion ie defin autramënter danter l Tibet y l Südtirol.

L presidënt Durnwalder à spiegà che la Provinzia à bele sustenì 17 proiec economics y culturei per l popul tibetian y che l ie unì spendù feter 650.000 Euro. Tl’ancunteda cun la Jonta provinziela ie unì rujenà de pusciblteies de culaburazion danter Bulsan y l’aministrazion dl Dalai Lama.

L se giaurì dla China ie iust chisc dis de atualità ajache nce l presidënt dl’America Barack Obama à fat n apel de chësc vieres.
“Ti ultimi 60 ani iel stat cater eres y for inò iel stat mudazions per se adaté ai tëmps. Chësc mostra che l ie bën puscibl arjonjer che la se muda nce tl Tibet” à dit l Dalai Lama. Mpurtant iel ntant de mantenì la cumuniteies tibetianes tl esil y curé la respunsabltà de mantenì la cultura. “Rujenan cun la Jonta ne à l Dalai Lama nia atacà la China, ël uel arjonjer libertà per l Tibet zënza viulënza” à dit l assessëur ladin Mussner.