Atualità
„Air Alps“ jola danter Bulsan y Roma
USP – “Air Alps” julerà nce tl daunì da Bulsan a Roma. La sozietà de jol à venciù l cuncors per la linea sustenida dala Provinzia de Bulsan. “Per l Südtirol sciche raion economich-turistich ie l culegamënt ala rë nternaziunela de joi de gran mpurtanza, per chësta rejon vëniel sustenì la linea Bulsan-Roma chiran nce mo d’autri culegamënc” à dit l assessëur Widmann.
L culegamënt cun l julier Bulsan-Roma ie de nteres publich y perchël possel nce unì sustenì dal’aministrazion publica. Tres n cuncors dl’aministrazion per l jol zevil ENAC iel unì scrit ora la linea Bulsan-Roma metan dant cundizions n cont de priejes y cumpëida de joi. Me na sëula sozietà se à pità per chësta linea. Al’ Air Alps ti iel unì slungià l dërt de julé nce tl daunì danter Bulsan y Roma.
„L unirà nce tl daunì pità 8 joi al di ntan l’ena y cater joi ntan l fin dl’ena” à dit l assessëur. „Per mantenì n bon livel per l turism, l’economia me nce per la scienza y furmazion, iel debujën che n sibe da arjonjer a chësta maniera”.
Per Widmann iel debujen de culegamënc ai zëntri de majera mpurtanza sciche Viena o Frankfurt. Dant muessel mo unì anjenià la basa per pudëi nce sustenì linies nternaziuneles. “Cun nosc sustëni se muvons aldò dla normes europees che ti dà mpurtanza ai aeroporc regiunei per l culegamënt dla region y l sustëni a chësta maniera per l’economia regiunela. Per chësta rejons iel mesun sustenì chisc joi” à dit Widmann.
as
