Atualità

Desvalì | 18.11.2009 | 11:18

Durnwalder sëurandà 29 uneranzes a atlec y funziuneres

USP – 17 atlec dla Provinzia de Bulsan che à venciù bedaies pra campionac dl’Europa y dl Mont à (nseira) ai 17 de nuvëmber pudù pië do dal presidënt Durnwalder l’uneranza di sportivi. Cun ëi iel nce unì unerà 12 funziuneres che se à fat merit. L sëul reprejentant ladin danter i unerei ie l campion dl mont de luesa Florian Clara da S. Martin.

Per l’ucajion à l presidënt dla Provinzia nvià atlec y funziuneres tl Felsenkeller dla Laimburg. L’uneranza di sportivi giapa chëi atlec che ntan i ultimi trëi ani à venciù bedaies pra campionac dl’Europa, dl Mond y pra Special Olympics.

Danter i unerei ie nce l Gerhard Kerschbaurmer che à venciù trëi bedaies mundieles cun la roda da mont, i campions dl mond de luesa sun streda naturela Patrick Pigneter, Florian Clara y Renate Gietl, l’atleta de arpizeda sun dlacia Angelika Rainer, Herta Lochmann y Gerda Lechner per l “chidlé sun dlacia”. Manfred Reichegger à venciù trëi bedaies europees tl jì cun la peves, Peter Fill ie vizecampion dl mond de superG y Marco Zanetti ie campion dl mond de billiard. Deberieda cun i atlec iel nce unì unerà funziuneres dl Cumité olimpich CONI y de lies provinzieles de sport.

“Nosc atlec ie bele dai ani na cherta da vijita per nosc raions, de chësc ons propi n stolz” nsci l presidënt Durnwalder. Acioche i atlec possa avëi suzes ne iel nia me debujën de si capaziteies sportives, lezitënza y n se purvé, ma nce dla pusciblteies de training. “On cialà de anjenië te duta la Provinzia de tel strutures acioche duc i pasciunei de sport posse ti jì do a si hobby” à dit Durnwalder, sorissan che iust da tan de pasciunei possa nce unì ora atlec de suzes.

“Na gran cumpëida de funziuneres ulenteres te duta la Provinzia de Bulsan tën sun l sistem dl sport” nsci l presidënt, che à lecurdà che statisticamënter ie uni terzo zitadin cumëmber de una dla 720 lies sportives che se nuzea de 2.600 mplanc dal sport tla provinzia de Bulsan.