Atualità

L majer puent a S.Crestina, dala raida dl Greva nchin da Artic à da tramedoi pertes giapà n dlander architetonich. Sun duta la lunghëza de 73 metri iel unì metù su dlandri de acel inox laurà a de plu manieres che spidla l linëus. Leprò iel nce unì fat na luminazion speziela che ti dà n cialé ora particuler.

De tei dlandri uniral nce fat pra l puent da Ruacia che mesura 57 metri. Per fé i lëures ne fossel nia debujën de śaré defin la streda, l bastëssa śaré mesa larghëza cun n semafer. Davia che scumëncia tosc la sajon da inviern an da permò fat ora de lascé chësc lëur a d'ansciuda.

Per i dlandri a S.Crestina ova l Assessorat provinziel ai lëures publics scrit ora n cuncors per architec jëuni. „L'idea ie stata de sustenì architec jëuni de nosta valedes“ spiega l assessëur Florian Mussner. David Stuflesser y Nadia Moroder de Urtijëi à venciù l cuncors  y do si idea iel śën unì realisà i dlandri dl prim puent. L urientamënt dl'opra architetonica vën dala cuntreda. La carateristiches de chësc raion dëssa se spidlé ti dlandri di puenc y tl medemo mumënt dëssi nce ti dé ai puenc pesoc n cialé ora plu lesier. I doi architec jëuni à ulù abiné n balanz danter elemënc da cësa - chëi dla cuntreda, y elemënc nueves. I dlandri de culëur d'or spidla l linëus dl surëdl y fej a chësta maniera referimënt al culëur cueciun (la nrosadura) che la Dolomites giapa da sëira. Aldò dl linëus che muda ntan l di spidla i dlandri nce n autra tonalità de culëur.