Atualità
Jonta provinziela: mudazions per cuntribuc turistics
USP - La Jonta provinziela de Bulsan à mudà la regules per cuntribuc ala lies turistics. A na maniera nueva dëssel nce unì dat ora i cuntribuc per chëi che ie jic a sté oradecà y vën a cësa per la veles. I criteries per mëndri lëures che ne se damanda nia na cunzescion da frabiché ie unic lascei do. Chisc ie stai i argumënc de majer nteres prejentei dal presidënt Durnwalder (ncuei) ai 23 de nuvëmber do la senteda dla Jonta provinziela.
Cuntirbuc ala lies turistiches
Ala lies turistiches ti à la Provinzia de Bulsan nchinamo dat nchin a 100.000 Euro per dumanda. Da moninla puderal me plu unì dat un n iede al ann cuntribuc de chësta mesura (ora de caji particuleres). La Jonta provinziela à nce mudà i criteries: l ne unirà nia plu dat cuntribuc per purtoies da jì cun la roda da mont y perchël per parcs de arpizeda danter i lëns (Hochseilgarten). Luesc cun manco de 300.000 nuetes afitedes puderà giapà cuntribuc che cuer dal 30% al 90% dl custimënt azetà. Chësta perzentuela va ju a 20%-80% per luesc cun manco de 300.000 nuetes afitedes te n ann.
Ndenità per chi che vif oradecà
La Jonta provinziela à dat pro de mudé i criteries per dé ora ndeniteies a chëi che vif oradecà y che vën a cësa per la veles o referendum. “Ndeniteies che fova mo da paië ora dal ann 1988 ie unides adatedes ala nflazion y chësc nes costa truep. Per l ultimo referendum vëniel paià ora de ndut danter 1,5 y 2 milion de Euro, te vel caji nce a jënt dla segonda generazion che ie jic a viver oradecà” à dit Durnwalder. La Jonta provinziela ulëssa mëter a jì la veles tres posta y n cajo paië ora ndeniteies aldò di chilometri de viac o na perzentuela sun la tarifes dla ferata.
Deguna cunzescion per mëndri lëures
Per de mëndri lëures ne iel nia plu debujën de na cunzescion da frabiche, l tleca n’autorisazion dl ambolt. Per smëndri la burocrazia à la Jonta provinziela slargià i criteries de chisc mëndri lëures. Deguna cunzescion da frabiche ne saral plu debujën per pitla stredes tl vërt urbanistich nchin a 750 metri de lunghëza (dant 500m), che ie 2,5 metri lerges y che à na pendënza nchin a 70% (dant nchin a 60%). Nia plu debujën de cunzescion edilizia ne saral per mures a sëch nchin a n’autëza de 2 metri (mpede 1,5 m), per splané prei nchin a 6.000 metri cuadrac (mpede 5.000) y valivé ora nchin a 1,5 metri de autëza (mpede 1 meter). Te raions urbanistics vërc ne saral nia plu debujën de na cunzescion per taië lëns. Nce banc dal’eves possa unì metui su zënza cunzescion.
Segurëza sun l lëur
L guviern a Roma vëija dant che patrons de lëur muessa fé na majera furmazion n cont de segurëza sun l lëur per pudëi tò su lauranc. Sun dumanda de plu lies provinzieles se mpënia la Jonta provinziela che l vënie smëndrì chësta regula y che la vënie spezificheda tl cajo de pitla firmes sciche le ie tlo da nëus. La Jonta provinziela uel ntervenì de chësc vieres pra la cunferënza danter Stat y regions.
Pesć per resultac universiteres
La Jonta à fat ora de adaté i criteries per paië ora pesć (nchin a 1.140 Euro) a studënc che arjonj de bon resultac te universiteies talianes. Studënc dla provinzia de Bulsan possa damandé chisc pesć nce se i studieia te d’autra regions dla Talia. Studënc dla Comunità Europea muessa avëi almanco da doi ani la residënza tla provinzia de Bulsan sce i studieia te na università taliana. Studënc che vën da ora dl’Europa muessa avëi la residënza de un ann sce i studieia tla provinzia de Bulsan. Sce i studieia te d’autra regions talianes ne ai nia la rejon de damandé chisc pesć.
Cunzescions dal’ega
Duta la dumandes de cunzescion dal’ega danter Franzensfeste y Funes ne ie nia unides azetedes dala Jonta provinziela. I assessëures à te chësc cajo sëurantëut la minonga dla cumiscion provinziela per l dann ambientel n cont de mplanc da fé strom ti chemuns de Franzensfeste, Vahrn, Persenon, Natz-Schabs, Feldthurns y Funes.
Cunzescions per l trasport publich
La Comunità Europea se damanda che duta la cunzescions de trasport publich vënie scrites ora a livel europeich. Te caji particuleres possel purempò unì slungià la vedla cunzescions nchin al 2019. La Jonta provinziela uel se nuzé de chësta puscibltà slungian la cunzescions nchin a 9 ani sce l n abina n’acurdanza sun criteries de cualità. “Sce la Comunità Europea dà ntant ora criteries nueves se tenions l dërt de desdì nosta cunzescions” à spiegà Durnwalder.
as
