Atualità
Mujiga tla Scola d’ert a Urtijëi: prejentazion ai 28 de nuvëmber
USP – Tl proscimo ann de scola, de autonn 2010 uniral tla Scola d’Ert Cademia a Urtijëi giaurì na sezion de mujiga. Ncuei 23 de nuvëmber à scumencià n’ena de pratica per sculeies dla scola mesana che finerà via n sada 28 de nuvëmber cun n di dla porta davierta per duc. N sada uniral fat de plu prejentazions dla cumposizion “art-fish-music”.
Per studënc dla sezion nueva de mujiga tla Scola d’ert uniral d’autonn leprò dodesc ëura de nseniamënt al’ena. L unirà nsenià a suné strumënc, storia dla mujiga, cumposizion, suné deberieda, bal y media nueves.
Chëst’ ena possa sculeies dla segonda tlas dla Scola mesana de Urtijëi se mescedé danter sculeies dla terza tlas dla Scola d’ert y mparé a cunëscer la lezions de depënjer, ziplé, grafica, mudelé, suné strumënc, cianté, fotografia, rujenedes y scienzes. Chësc proiet per i sculeies plu jëuni unirà finà cun n di dla porta davierta.
N sada, 28 de nuvëmber uniral danmesdì (8 ala 12), uni ëura plëina prejentà la cumposizion “art-fish-music”. Chësta prejentazion te duc i cater partimënc dla Scola d’Ert possa nce unì vijiteda da tlasses ntieres, che dëssa se nuté su al numer de telefonn 0471-796240.
as
