Atualità

Scora / Cultura | 26.11.2009 | 14:53

Futurum, la fiera dla furmazion per duc

USP – Per l segondo iede vëniel a Bulsan metù a jì la gran fiera dla furmazion tla Provinzia de Bulsan. La fiera Futurum mostra dal 10 nchin ai 13 de dezëmber la gran vela de furmazion per i mëndri nchin ala jënt de tëmp de duta la trëi grupes de rujeneda. Ncuei (26 nuvëmber) iel unì prejentà Futurum te na cunferënza stampa.

I dis dal 10 ai 13 de dezëmber possa uni un se nfurmé y se crì si streda. Chësc ie chël che Futurum uel arjonjer tla fiera de Bulsan. Sciche bele dan doi ani uniral mustrà su y cunsià a nteressei de un età la pusciblteies de furmazion tla Provinzia de Bulsan. Prejentà vëniel la scoles dala scolina al’università, la furmazion prufesciunela y i cursc d’uni sort.

“L’educazion y la furmazion ie nosc nvestimënt tla persones, te si capaziteies y savëi” à dit l assessëura Kasslatter Mur. La furmazion, savëi y creatività de nosc zitadins ie la streda per la cumpetività dla provinzia che na à nstës nia materies primes. “Nosta cumenanza se muda for inò, perchël nsci l assessëur Tommasini, iel nce debujën che la jënt tën l var di tëmps tres furmazion y ajurnamënc”. Tl Südtirol iel unì arjont na gran vela de pusciblteies de furmazion, y la Provinzia fej for de majeri nvestimënc per miuré mo de plu la cualità. “Ne aron mei finà de mparé. La fiera futurum nvieia a tò su cuntac ma nce a lauré mo plu deberieda tla furmazion”, nsci l nvit dl assessëur Mussner ala populazion ladina.

La fiera Futurum ie frut de na culaburazion danter plu istituzions provinzieles cun l sustëni de partner y sponsores privac. L ie na culaburazion che tol ite duta trëi grupes de rujeneda. Nsci ie la plata internet www.futurum.it nce unida anjenieda tla rujeneda ladina. Danter i 60 stonc che mët ora saral nce l Istitut pedagogich ladin deberieda cun la Ntendënza ladina. “N pont che ulon mustré su particularmënter ie la didatica ntegreda, chëi mumënc ntan l nseniamënt per ti mustré ai sculeies na vijion de duta la cater rujenedes che vën nseniedes” spiega l diretëur dl IPL Theodor Rifesser.

La fiera ie partida te 18 insules nfurmatives che va dala scoles de ublianza, ala rujenedes, sport, wellnes, lën, lëur da paur, frabiché, cultura o scienzes. Sëuraprò vëniel mo pità n program de cunvënies, cunferënzes y grupes de lëur tl Hotel Sheraton.

“La truepa y bona pusciblteies de furmazion vën nuzedes for de plu ajache danter jì jëuni iel na gran ueia de furmazion” à cunstatà l assessëur Berger cun sudesfazion. “Tla fiera Futurum ne se prejenterà nia me la furmazion teorica ma nce la pert pratica”. Furmazion ie daunì, de chësc viers l nvit a uni un de jì a ti cialé ala fiera Futurum. L ntreda ie debant.