Atualità

Desvalì | 28.11.2009 | 16:36

De gra ala prutezion zevila per l mpëni tl Abruzzo

USP – Mprescion à ncuei (28 nuvëmber) fat l’ancunteda tla fiera a Bulsan. La Provinzia de Bulsan ova nvià duc chëi che ti mënsc passei ie stai tl Abruzzo lauran per la persones tuchedes dal tremot. Cun l vëscul Karl Golser iel unì tenì na santa mëssa, l presidënt Luis Durnwalder y l assessëur Florian Mussner à rengrazià.

N tremot ova ai 6 de auril desdrù trupa cëses tla provinzia de l’Aquila gaujan nce la mort de feter 300 persones. Mo n chël di fova da Bulsan mueta na scuadra per jì a njinië ca n aiut. „Son anjeniei a jì, ajache te tel catastrofes iel debujën de uni aiut y la solidarietà de duc“ à ncuei dit l presidënt Durnwalder, sorissan nce l stolz che tan de persones che se à fat inant, dunfrian si tëmp liede y metan a desposizion si lëur canche l ie d’autri che à debujën. Chësc ie n sëni tler che nce te nosc tëmps ne conta nia me valores materiei ma nce valores umans. Tosc do l tremot iel da pert dl Südtirol unì sëurantëut l camp a Sant’Elia, na frazion de L’Aquila. Per mez ann à tlo laurà culaburadëures provinziei (Furestela, Servisc per l’eghes y lëures publics) ma nce destudafuech, Crëusc Blancia y Cuecena, judacrëp, psicologhes de emergënza, Grupa radio y dutores de Medicus Comicus, coordinei dala Repartizion provinziela per la Prutezion zevila.
De ndut ie 560 ulenteres y 70 culaburadëures dependënc dla prutezion zevila cun leprò mo 75 dl Servisc per la stredes stai tl Abruzzo. L ie unì laurà te turni che à durà nchin a doi enes. De ndut iel da pert dl Südtirol unì judà cun 6981 dis de lëur a persona che fej ora de ndut 89.453 ëura de lëur.

„Danter chëi che à judà y la populazion ie unì a se l dé na cumenanza, y nce cun nosc aiut ie L’Aquila inò ressusciteda“ à dit l assessëur Florian Mussner. Judà iel nce unì cun frabiches: 20 cëses prefrabichedes per 72 persones. Per d’autra cëses iel unì anjenià undesc plates ulache la Prutezion zevila de Stato à fat su cëses. „Ajache l fova tan prëscia ons fat chisc lëures cun nosc lauranc provinziei“ à dit Mussner. La nfrastrutures primares, la fundamëntes, la roles dal’ega, la canalisazions, la roles per strom y gas ie unì fates dai tecnics dl Servisc provinziel per la stredes. Chisc lauranc à ora de ëura mo laurà inant sun basa ulentera.