Atualità
Fazion dl Cuntrat de Lissabon per la provinzia de Bulsan
USP – Do che l Cuntrat de Lissabon ie unì ratificà de fin, jirà la mudazion ala strutura dla Comunità Europea (duman) ai prim de dezëmber n drova. La fazion sarà nce da sentì tla provinzia de Bulsan. “Dantaldut se fajerà sentì la majera cumpetënzes dl parlamënt europeich tl lëur da uni di” à dit l presidënt dla provinzia Luis Durnwalder.
La nuvità plu evidënta che cumporta l Cuntrat de Lissabon ie la majera cumpetënzes per l parlamënt europeich. La ne se trata nia plu de me rujené pea, nce a livel de Europa uniral fat na pruzedura ufiziela per fé na lege. “A chësta maniera vën l defizit democratich nia tëut demez, ma mpo smendrì” à dit Durnwalder, sorissan che l sëul gremium lità diretamënter dala populazion devënta pert primara per tò dezijions.
L presidënt dla provinzia sorissea che te chëla che l parlamënt vën trat ite tla pruzedura de fé na lege, sarà si nflus nce da sentì te cuestions che toca dassënn l Südtirol. “Son de chëla che dantaldut la politica dl’agricultura dependerà truep da chësta nuviteies” nsci Durnwalder. L ie da fé cont che cun la ntroduzion dl Cuntrat de Lissabon pierderà i argumënc politics zentrei dla “vedla” Cumenanza Europea “EG” de mpurtanza. Danter chisc iel nce la politica dl’agricultura.
Cun l tré ite dl parlamënt deventeral, nsci Durnwalder, nce plu rie a fé Lobby a Brüssel. Nce sce la dezijions unirà śën spartides su sun plu jënt y nia me lascedes ala cumiscion, speren che l ti unirà nce scutà su a de pitla realteies. “Sce la sussidiarietà vën mo trateda cun scerietà, pona muessa la jonta dla regions mo pudëi rujené pea cun n cër pëis” dij Durnwalder.
as
