Atualità

Aministraziun | 30.11.2009 | 14:43

Jonta provinziela dl 30 de nuvëmber

USP – La cherta per museums, nfrastrutures sportives o trasport publich “Destination Card” vën nce sustenida dala Provinzia de Bulsan. La regulamentazion per butëighes dai Souvenir per pudëi tenì daviert ntan l fin dl’ena ie unida dateda. Tratatives cun l Guviern talian per l finanziamënt dla Provinzia. Chisc ie stai i argumënc de majera mpurtanza che l presidënt Durnwalder à prejentà do la senteda dla Jonta provinzia da ncuei (30 nuvëmber).

Destiation Card
Museums, mplanc dal sport, per l tëmp liede o mesuns publics dëssen tl daunì pudëi adurvé te plu raions turistics cun na cherta sëula. “La ‘Destiation Card’ ie fata do l prinzip dl Superskipass ulache l davani dla chertes vën pona spartì su aldò de tant che ie unic nuzei i servijes” à spiegà l presidënt dla Provinzia. L priesc dla cherta unirà a se l dé aldò dla cumpëida di servijes che vën pitei, garantian n priesc plu bas permez a ntredes singules. La Jonta provinziela à dat pro de scrì ora n cuncors per n sistem acioche la Destination Card posse nce unì adurveda cun i sistems che ie bele. L cuncors vën scrit ora per n custimënt ie de 288.000 Euro.

Butëighes dai Souvenir
La regulamentazion acioche butëighes possa nce tenì daviert de sada y dumënia ie unida mudeda. I ambolc possa aldò de chësta mudazion dé la lizënza de tenì daviert l fin dl’ena a butëighes che vënt articuli aldò dla lista data pro. Chisc prudoc ie n gran pert souvenier che va dai fazulëc ala sciarpes, zandli, pec de pel, chertes da scrì, chertes dla stredes, articuli da scrì, ciofs, ciapiei, ombreles, fotos y nsci inant.

Tratatives per l finanziamënt da Roma
L finanziamënt dla Provinzia de Bulsan da pert de Roma ie l argumënt dl di. Bulsan giapova i ani passei la chëuta tlameda IVA sostitutiva sun l import de prudoc tres l Prëner. Cun la regules nueves ne muessa chësta nia plu unida paieda sul Prëner y nsci ie nce unì a mancë feter 337 milion de Roma. Manco scioldi dal Stat ie nce unic tres la pert variabla che reverda la scola, motorisazion y la stredes. La Jonta provinziela de Bulsan cun l bënsté da pert dla Region à nciarià l presidënt Durnwalder de marciadé per arjonjer n’acurdanza sun n finanziamënt segur, zënza mussei marciadé uni ann da nuef. La pruposta ie chëla che Bulsan sëurantulëssa mo cumpetënzes nueves y che l Stat manda de reviers l 90% dla chëutes che vën paiedes tla provinzia de Bulsan. “Cun l curì dl custimënt per la cumpetënzes nueves fajons cont de mussei smendrì l bilanz provinziel” à dit Durnwalder. Dal’autra pert aspieten a Bulsan dal 2006 mo sun 2,2 miliardes de Euro. La tratatives ie prugramedes (ncuei) lunesc domesdì a Milan.

Finanziamënt per i judacrëp
La Jonta provinziela de Bulsan à dat pro la cunvenzion cun l’assoziazions de judacrëp dl BRD (34 stazions de aiut) y CNSAS (22 stazions de aiut) per n finanziamënt de 1.281.500 Euro. La se trata de finanzië nchin al 100% dla spëises ordinares. La cunvenzion nueva jirà ndrova cun l prim de jené 2010. “L servisc de judacrëp fej pert dla prutezion zevila y per chësta rejon iel nce drët che i giapà finanzià si materiai, nvestizions y l atività” à spiegà Durnwalder.

Ferata naziunela
Sun la linea de ferata che vën da Hamburg vëniel menà ju 22.000 auti al ann cun de ndut feter 50.000 turisć. La ferata taliana Trenitalia uel auzé l custimënt per la ferata tudëscia dl 17 nchin al 31%. Chësc aumënt ne possa i tudësc nia azeté y nsci manacia l trasport de auti per turisć de tumé demez. Per la Jonta provinziela ie chësc servisc mpurtant per la populazion y per l turism, perchël uelen ntervenì pra Trenitalia per abiné na soluzion.
Trenitalia à nce tëut demez ferates che da Bulsan furnea diretamënter a Roma. La ferata taliana à śën pità de mëter a jì inò chësta lines sce Bulsan juda a paië pea. “Chësc pudëssa deventé n cajo de prezedënza che uni iede che la se trata de na ferata naziunela tlo da nëus, messons paië pea” à dit l presidënt Durnwalder. “Treniatlia à l duvier de mëter a jì l trasport sun scines nce sce l ne sauta nia for ora n gran davani, perchël ne pudons nia azeté de paië pea la ferates naziuneles” à dit l presidënt.

Cuntribuc per nia comuniteres
N cont de paië ora i cuntribuc per l fit de cuatieres a zitadins nia comuniteres, à l presidënt Durnwalder stlarì che i cuntribuc unirà a uni maniera paiei ora, nce sce plu tert. Passa l 34% de duta la dumandes de cuntribuc provinziei per l fit de cuatieres ie unides mandedes ite da zitadins nia comuniteres. La Provinzia à resservà l 7.8% de chisc cuntribuc, a zitadins che vën da ora dl Europa nce sce ëi arjonj me l 4,4% dla populazion. Per l ann 2009 fej chësc ora 10,8 milion de Euro. “Davia che per l ann passà iel mo restà da paië ora 2,5 milion de Euro, unirà i cuntribuc da chëst ann paiei ora plu tert” à dit Durnwalder.

Locai per assoziazions estremes
Aldò de nrescides dla Jonta provinziela dëssa stimené la ujes aldò de chëles che l Istitut per cuatieres soziei IPES dëssa avëi fità locai a assoziazions de man drëta estrema. Te chisc locai dëssel vester unì njenià ite la bibliotech "CasaItalia". La Jonta provinziela à nciarià dl IPES de ti jì do a chësc cajo y sce l ëssa propi da se traté de n’assoziazion estrema, de desdì riesc l cuntrat. Mplu dëssel tl daunì unì cialà do miec a chiche vën fitei i locai soziei, finanziei cun scioldi publics.