Atualità
Svilup turistich: record per Gherdëina y Badia
USP – L ann turistich 2008/09 ie n ann da record. Mo mei ne iel stat 5,5 milion de turisc’ tl Südtirol che à durmì de ndut 28 milion de nuetes. L Istitut provinziel de statistica ASTAT à per setëmber y utober 2009, permez al ann passà, cumpedà n aumënt dl 6,1% dla persones unides adalerch y 4,3% de plu nuetes afitedes. I majeri aumënc ie unic cumpedei tla doi valedes ladines: Gherdëina y tla Val Badia.
L bon instà à per l prim iede purtà passa 17 milion de nuetes afitedes. A chësta maniera iel, do 14 ani, unì batù l record dl instà 1995. Tla sajon da instà iel te dut Südtirol unì cumpedà n aumënt de 5,3% di turisć unic adalerch y 3,4% de plu nuetes afitedes. Di 11 raions turistics à i doi cunsorc turistics ladins arjont l majer aumënt. Te Gherdëina ie l aumënt stat de 10,4 % pra la persones unides adalerch arjunjan 6,9% de plu nuetes afitedes. Tl’Alta Badia iel unì adalerch 9,4% plu turisć che à fat ora n aumënt dla nuetes afitedes dl 7,2%. Chësta bona zifres ie nce unì arjontes ajache l ann dant ova la doi valedes ladines abù n pue’ manco jënt permez ala media.
A livel de Südtirol iel pra la nazions unì cumpedà n aumënt dl 2,3% pra i turisc de naziunalità taliana. La naziunaliteies fulestieres cun l majer aumënt ie states l Benelux (+9,3%), l’Austria (+5,3%) y la Svizra (+4,4%).
as
