Politica | 01.12.2009 | 09:04

Stat y Provinzia a una per l finanziamënt provinziel

USP – L finanziamënt dl’autonomia de Bulsan ie nsëira (30 nuvëmber) unì metù sun na basa nueva. Pra tratatives a Milan ie l presidënt dla provinzia Luis Durnwalder y i ministri Giulio Tremonti cun Roberto Calderoli ruvei a una per n finanziamënt plu segur per Bulsan mpede messëi uni ann marciadé da nuef.

Feter trëi ëura iel n sëira unì marciadà danter i presidënc provinziei Durnwalder y Dellai cun i ministri Tremonti y Calderoli dan ruvé a una sun la forma nueva de finanziamënt. “L resultat dla tratatives ie per tramedoi pertes positif: l Stat giata plu scioldi, la Provinzia à plu segurëza” à dit l presidënt.

L’acurdanza che puderà me plu unì mudeda cun tramedoi pertes a una, vëija dant che Bulsan giapa l 90% de duta la chëutes che vën paiedes ite tla provinzia. Da nuef iel dantaprima che la Provinzia giapa de plu sun la chëuta sun l davani dla sozieteies IRES o i tribuc sun i juesc de fertuna. “A chësta maniera pudons fé cont cun 300 milion de Euro de plu” à dit Durnwalder.

L Stat dajerà l finanziamënt che ie debujën per la cumpetënzes sëurandates, che ie la scola, la gestion dla stredes y i ufizies de motorisazion. Per chisc capituli iel debujën de feter 300 milion de Euro al ann. Mplu iel unì marciadà ora che l Stat paia uni ann 100 milion de Euro ala Provinzia per paië ju i debic dai ani dant.

La Provinzia ciafieia zënza la somes che ie uni ann unides marciadedes per curì l mancë dl’Iva sostitutiva sun l import (337 milions de Euro), la pert dl bilanz che trajova adum scola, stredes y motorisazion (301 milion de Euro), i scioldi dla lege sun i setores che vëija dant programs y fond speziei per singuli ciamps. De ndut uniral a mancë feter 702 milions de Euro per la Provinzia.

A Milan iel nce unì marciadà de cumpetënzes nueves che la Provinzia ulëssa sëurantò. Per chëstes ie la Provinzia anjenieda a spënder nchin a 100 milion de Euro. Chisc scioldi unissa adurvei per sustenì la persones zënza lëur, te cassa ntegrazion o n mubilità, ma nce paiamënc al’università o al conservatorio, per la posta o l finanziamënt di programs tudësc y ladins dla RAI. La Provinzia muessa nce realisé i programs per i chemuns sun la sëida cun Belluno y Sondrio, che ie unic marciadei cun l Stat. “Chisc 100 milion de Euro jirà sambën me al Stat aldò dla cumpetënzes che giapon” à dit l presidënt dla Provinzia.

Sota la rissa fej Durnwalder cont che cun la majera ntredes dala chëutes, dala cumpetënzes sëurandates, l paië ju dl debit di ani dant, ma nce cun la mëndra ntredes, uniral arjont n bilanz provinziel feter sciche chëst ann. “Nce tl daunì ruverons sun feter 5 miliardes de Euro” à dit l presidënt a Bulsan. 

L’acurdanza da nsëira vën śën ntegreda tla lege finanziera. Do che chësta unirà data pro tl parlamënt, messerà unì adatedes la normes de atuazion per l Statut de autonomia.

as