Desvalì | 01.12.2009 | 12:32

Segures sun i schi cun l casco: Berger prejënta l’azion

USP – Sun i purtoies dai schi dëssa l casco deventé na cossa da uni di y la cazina me pu n’ezezion. Per arjonjer chësc, à l dipartimënt provinziel per l turism y la Südtiroler Sporthilfe, nvià via na campania promozionela. “Ulon senté sun la respunsabltà de chëi che va cun i schi, zënza messëi se nuzé de leges o urdenanzes” nsci l assessëur Berger.

L’azion ti va do al vedl dit che se cruzië danora ie miec che curé daldò. “Do uni majera desgrazia vëniel inò svaià do na regulamentazion plu sciorfa” à dit Berger pra la prejentazion, sorissan nce che “L ne possa nia vester che n sport de tëmp liede sciche l schi, vënie regulamentà a na maniera che pra uni muvimënt muessen se damandé sce n ie bën stai a norma de lege”.

Deberieda cun la Sporthilfe, reprejenteda a Bulsan dal presidënt Walter Ausserhofer, an metù a jì n’azion de sensibilisazion. Ti raions da jì cun i schi, cun placac, nserac ti media, prupostes a mpresté ora i schi, scrites sun la curieres y material de nfurmazion tl’apoteches y pra i dutores, uelen lecurdé i periculi dl jì cun i schi zënza casco y nsci sensibilisé a tò l casco.

Persones de referimënt de majera mpurtanza ie i maestri de schi. Cun la direzions dla scoles de schi an rujenà acioche i debe inant ai maestri la ncëria de sensibilisé la jënt te si funzion de ejëmpl. “Chësc nes sta a cuer per no messëi fé urdenanzes aldò” à spiegà Berger. Per i maestri de schi iel unì fat n casco aposta cun la merca Sudtirol y l blason provinziel.

Testimone dl’azion de sensibilisazion ie l atlet Peter Fill. “Sustëni chësta scumenciadiva ajache trueps che va cun i schi tl tëmp liede ne se rënd nia cont tan debota che i va” à dit l campion da Ciastel. L primar dla stazion de prim aiut dl spedel de Bulsan, Manfred Brandstätter à juntà: “Nstëss toli bele diesc ani l casco y trueps se l à rì, ma te mi lëur é bele messëi udëi massa”. Aldò dl primar à la moda dl casco da jì cun i schi bele śën purtà na reduzion di trauma al cë y cervel.

as

Galaria dales fotografies

N apel a to l casco da ji cun i chi: (d.m.c.) Zorzi, Fill, Ausserhofer, Berger y Stricker;