Desvalì | 02.12.2009 | 15:07

Internet debota per duta la Provinzia de Bulsan

USP – La Jonta provinziela de Bulsan se ova dl 2004 tëut dant che l culegamënt internet a “banda lergia” dëssa arjonjer dut l raion. Chësc fin ie sën unì arjont. “L culegamënt internet che va debota dëssa nce unì pità a chiche sta ora di zëntri” à sorissà i assessëures Mussner y Berger ncuei (02 dezëmber) pra la prejentazion di lëures.

L culegamënt internet debota vën tl raion dla provinzia de Bulsan pità a cater manieres. Tla ziteies y ti majeri luesc iel unì metù l culegamënt de fibra otica. Te feter duta la provinzia giaten l culegamënt internet tres la rë de zeluler GSM y UMTS a na velozità de 2 Megabit al secunt. Per la cëses che stà n pue’ ora dl luech iel la puscibltà de culegamënt zënza cabli, wireless. Per la cëses plu desman à la Provinzia judà a paië l servisc tres satelit. “L internet debota ie stat n gran lëur che se à cumplicà tres la tratatives per la linies che fova bele y per la situazion geografica di pitli luesc y dla frazions. Śën sons perchël mo plu cuntënc dl bon lëur che ie unì arjont y ulon se cunzentré per miuré mo de plu l servisc” à spiegà l assessëur ala strutures Florian Mussner. La sozieteies dal telefonn pieta l internet debota ulache les se vëija ora n davani. “L’aministrazion publicà se à sëurantëut dl bujën de internet debota nce per chiche vif ora di zëntri per ti pité la medema pusciblteies. Ne ulon de chësc vieres nia doi categuries de zitadins” à spiegà l assessëur Hans Berger. La Provinzia de Bulsan à scumencià a smendrì burocrazia pitan servijes che n possa fé tres internet. “Acioche chësc possa jì bën iel tler che la jënt adrova nce l culegamënt nchin tla pitla frazions” à dit i assessëures provinziei tla cunferënza stampa a Bulsan.

“L standard dl culegamënt internet a ’banda lergia’ ie al mumënt de 2 Mb/s, ma l svilup nes mpermët valores mo scialdi plu auc per l daunì. Cun l culegamënt de fibres otiches ons na strutura che jirà nce bën ti proscimi ani” à spiegà l ing. Marco Springhetti. La fibres otiches ie cabli sutii sciche n ciavël tres chëi che l linëus vën mandà inant sciche cun spiedli. Chësc signal va tan debota sciche l linëus. La linies de fibra otica ie bele finedes tla valedes prinzipeles y secunderes dla provinzia, per culeghé i luesc ti raions terzieres iel bel anjenià i proiec. La Jonta provinziela ova de auril 2004 tëut la dezijion che duta la pitla firmes cun passa trëi lauranc, 95% dl’autra firmes y nsci nce l 90% dla populazion dëssa giapé l internet a “banda lergia”. Chësc fin ie do cin ani de lëur unì arjont purtan la provinzia de Bulsan a n bon livel tl cunfront europeich.

L culegamënt ie nce de gran valor per caji de prim aiut. Nchin ala fin dl ann sarà l servisc de culegamënt per zeluler (y tres chësc nce internet) nce ti raions de Schlinig (Val Venuesta), Klausberg y Speikboden (Ahrntal), Pfunders (Puster) y tla valeda dl Jaufen (Sterzing).

Internet tla Val Badia
Te duta la Val Badia giaten l internet debota tres l sistem zënza cabli, wireless. La cëses desman possa se anjenië l culegamënt sateliter a n priesc feter unfat sciche l internet debota ti luesc. I proiec ie bele njiniei per mëter sun 23 chilometri dla Val Badia la lines de fibres otiches. L prim toch unirà fat da S.Laurënz nchin Longega cun culegamënt per Al Plan, l segondo toch nchin a La Ila. “Da permò ons destinà 2,45 milion de Euro per chësc segondo toch che tol nce pea S.Ciascian” à dit l assessëur Mussner. Tl Chemun de Corvara y nchin a La Ila iel bele la fibra otica che ie unida metuda passan per l jëuf de Frea. “Te n ann y mez fajons cont che nce tla Val Badia possen se taché ite al internet tres la fibres otiches” à dit l ing. Springhetti.

Internet te Gherdëina
Te Gherdëina iel bele l culegamënt internet a “banda lergia”. Canche n arà finà i lëures ti autri raions, iel proietà de fé na segonda linia de fibres otiches te Gherdëina che fej pert dla rë provinziela per la strutures publiches y de prim aiut.

as

Downloads