Trafich | 09.12.2009 | 16:36

Dal 13 de dezëmber deguna ferata Bulsan-Roma

USP – Uni ann vën i orars naziunei dla ferates mudei la segonda ena de dezëmber, per chësta rejon an nce tla provinzia de Bulsan messù adaté di orars. “Chësta mudazion nes desplej, ma la ne se lascia nia astilé ora” nsci l assessëur Widmann ncuei (9 dezëmber) te na cunferënza stampa. La majera nuvità reverda la ferata taliana che dal 13 de dezëmber tol demez l culegamënt zënza baraté ferata, danter Bulsan y Roma.

Nce sce unirà a mance l culegamënt zënza baraté ferata nchin a Roma, à l assessëur provinziel Thomas Widmann nce prejentà de bona nuviteies. “Avisa te n ann ne saral nia plu debujën de mudé i orars dla ferates de puec menuc. A chisc orars possa pona nce unì adatei i culegamënc dla curieres. Nes on tëut dant na programazion per cin ani, chësc ons nce arjont.”

I culegamënc cun la ferata tla provinzia de Bulsan uni mes’ëura ie anjeniei, se ncunforta Widmann. „Tl ann 2004 à la ferates fat 2,8 milion de chilometri, tl 2010 fajons cont cun 5,6 milion de chilometri.”

N cont dl tumé demez dla ferata Eurostar y Eurocity danter Bulsan y Roma se sënten lascei sun na pert. “L tò demez de chësc culegamënt ne ie nia drët, ma nëus ne on nia cie fé cun chësc ajache l ie de cumpetënza dl Stat” à dit Widmann. Trenitalia se damanda 1,2 milion de Euro dala Provinzia de Bulsan per mantenì chësc culegamënt che dura passa cin ëura. “Ne paieron a deguna maniera, ajache chësc servisc ie de cumpetënza dl Stat y ajache l ne ie nia da azeté dal pont de ududa tecnich, canche l fossa mesun ruvé a Roma te cater ëura y mesa” à dit l assessëur provinziel.

Do l 13 de dezëmber unirà culegamënc intercity me plu pitei dala ferata dl’Austria (ÖBB) y dala ferata tudëscia (DB), culegamënc che ne azetea nia i abunamënc y la chertes dl servisc provinziel. Un n iede al di furnea na ferata da Minca a Bulsan, da Minca a Bologna y da Minca a Milan. Doi iedesc al di furnea la ferata da Minca a Verona.

Trenitalia se à segurà l dërt per la lines da Bulsan y Ancona y Bologna. Chëstes unirà bonamënter furnedes cun i orars che vel dal 3 de auril inant. Trenitalia à truep debic y problems. “O che paion nstësc o che l ne suzed nia, perchël à la Provinzia anjenià ca 21 stazions, nce ajache la jënt aspieta demanco” nsci Widmann.

“Cun la SAD y l’autra firmes da tlo ons slungià la cunzescions per 9 ani. L’alternativa fossa stat n cuncors a livel europeich, che fossa stat n pericul per milesc de stieres” à juntà l assessëur ala mubilità.

I particuleres di orars da inviern ie nce da pudëi cialé do sota la plata internet www.sii.bz.it, i orars stampei unirà spartii ora plu tert.

as

Downloads