Atualità
Streda nueva de Rina: segondo toch do l inviern
USP – La streda per ruvé a Rina ie bëndebò strënta no me curieres y camions se stënta tla raides, ma nce cun l auto ne iel nia dlonch mesun despassé via. L Assessorat provinziel ai lëures publics à udù dant de miuré y slargë duta la streda de feter 3,8 chilometri. Chëst ann iel unì finà l prim toch y do l inviern uniral riesc jit inant cun la segonda pert di lëures per miuré y garantì plu segurëza sun la streda de Rina. Da permò iel unì sëurandat i lëures dl segondo lot ala firma Wipptaler Bau de Sterzing.
I lëures per miuré la streda de Rina ie unic spartì su te de plu pertes.
Per seguré y slargë la streda dal punt da Rina nchin tl paisc de Rina à l assessorat provinziel ai lëures publics udù dant n nvestimënt de ndut 7.473.000 Euro. “Chësta streda ie te n raion che ne stà nia tan fërm, la vedla streda ie a luesc me 4 metri lergia y sun vel pertes iela massa ërta per garantì na bona viabltà y dantaldut la segurëza per la persones” spiega Florian Mussner l debujën de chisc lëures.
La prima pert di lëures ie unida fineda d’ansciuda. Sun na lunghëza de 500 metri iel unì slargià la streda fajan nce da nuef n pitl puent de 6 metri de lunghëza. Per miuré chësc prim toch cun nce la prima doi raides stersces iel unì proietà n custimënt de 1.928.000 Euro.
Per la segonda pert di lëures iel unì finà via la preparazion tecnica a na maniera da pudëi mëter man cun i lëures do Pasca. L cuncors per i lëures à venciù la firma Wipptaler Bau de Sterzing che à cun 1.633.504 Euro pità n priesc de 6.487 Euro plu bas permez ala soma proieteda.
L unirà laurà dal chilometer 0,54 suvier per na lunghëza de 716 metri. Per slargë la streda iel nce tlo debujën de fé da nuef mures dessëura pert y dessot pert de streda. N generel uniral laurà do la medema tecniches sciche pra l prim toch, ma sëuraprò saral nce debujën de micropei. “Seguré l rone ie te chësc cajo dassënn rie ajache l ie damat ërt” spiega l geometer Davide Ziller. Nce sce la cundizions ne ie nia scëmples, ne muessa la streda nstëssa nia unì spusteda. I lëures che ie udui dant per n tëmp de 12 mënsc, cun na paussa d’inviern. L custimënt de chësc segondo lot, danter preparazion tecnica, segurëza ntan i lëures y i lëures nstësc ie unì proietà per 2.200.000 Euro.
Ntan i lëures saral a mumënc nce debujën de śaré defin la streda garantian purempò che la jënt possa passé da duman, da mesdì y da sëira. Chësc ie dantaldut de mpurtanza per i perndolares y i sculeies.
Tl proiet dl ing. Gustav Mischì iel sëuraprò a slargë la streda, nce unì tenì cont de tò demez l ërt. Dantaldut tl prim y tl ultimo toch de streda vala de smëndri pendënzes che ruva nchin al 14-15%. Per auti, curieres y de majeri mesuns saral for plu saurì passé nce tla set raides stersces (tornanc), canche la raides strëntes (raggio 8 metri) sarà me plu n lecort.
as
