Atualità
Jonta provinziela: bilinguism per ladins
USP – L recunescimënt dla matura ladina per l’ejam de bilinguism y i inuemes da adurvé tl turism ie stai i argumënc de majer nteres per la populazion ladina, prejentei dal presidënt dla provinzia Luis Durnwalder ncuei (21 dezëmber) do la senteda dla Jonta. La proscima senteda dl guviern provinziel sarà l mierculdi ai 30 de dezëmber.
Dala Jonta provinziela se à l assessëur Florian Mussner damandà la recunescënza dl plurilinguism per ladins. La cumiscion di sies à laurà ora na pruposta acioche l ejam de matura te na rujeneda provinziela y l titul universiter tl’autra rujeneda vënie recunesciù per l ejam de bilinguism. Per i Ladins iel unì damandà che l’ejam de na scola auta paritetica vel sciche recunescimënt dl tudësch y dl talian. L titul universiter per tudësch o talian dëssa per i ladins valëi per l bilinguism de livel „A“. Aldò dl presidënt Durnwalder iel per chësta pruposta debujën de marciadé cun l partner de coalizion, dan ti fé na pruposta al cunsëi di ministri.
Inuemes ufiziei tl turism
La Jonta à tratà l’esprescion „Tourismus“ che dëssa unì adurveda mpede „Fremdenverkehr“ che fej referimënt al fulestier mpede al’idea de ghest. Duc i ufizies de cumpetënza dëssa perchël per tudësch adurvé l’esprescion „Tourismus“. I assessëures à nce tratà inuemes dl luesc da adurvé tla promozion canche la se trata de manifestazions a livel nternaziunel. De chësc viers iel unì fat l ejëmpl che l ie me unì adurvà l inuem Gardena y nia Gröden. Per lauré inant do una na linia canche la se trata de inuemes de luesc y raions, iel unì fat ora de mëter su na cumiscion aposta cun reprejentanc dl Alto Adige/Südtirol Marketing, EOS y chëi dala versura y dal vin, per prejenté prupostes de descuscion.
Gran nëif dl 2008: cuntribuc ai chemuns
La Jonta provinziela à destinà 5,5 milion de Euro ai chemuns che à abù de majeri lëures per la truepa nëif dl ann passà. Chësta soma, cun 2 milion dal Stat, vën spartida su do trëi categuries aldò l index Astat (chemuns giapa 75%, 30% o 25%).
Gestion dl IRAP al’Agenzia dla ntredes
La Jonta à azetà la cunvenzion per sëurandé la gestion dla chëuta IRAP y dla njonta IPEF per l 2010, al’Agenzia dla ntredes. La se trata de tò ite la chëutes, de paiamënc y cuntroi per na soma de 500.000 Euro.
Servisc de radioterapia tl spedel de Bulsan
Tl spedel de Bulsan dëssel unì metù a jì l servisc de radioterapia. Chësc dëssa giapé lerch sun trëi partimënc tl frabicat nuef. L custimënt per l frabicat ie de 15 milion de Euro, la njinies spezialistiches unirà a custé ntëur i 13 milion de Euro.
Valorisazion di vedli mestieres
Aldò de n’acurdanza cun autra cater regions y l finanziamënt dla Union Europea uelen tres na scumenciadiva valorisé i vedli mestieres. L dëssa unì cherdà n vita y mantenì mestieres da zacan che va dal sartëur a chël che fej la cëntes, l calighé, vedli mestieres cun l lën o drap, tres scumenciadives de furmazion y nfurmazion. L ie nce udù dant de aumenté i cuntribuc publics.
Aministrazion dl Museion
La jonta provinziela à numinà i cin cumëmbri dl’aministrazion dl Museion che possa unì metui dala Provinzia. L se trata dl’esperta Ulrike Rubner, la storica d’ert Marion Piffer-Damiani, l aucat Paolo Prinoth per la grupa de rujeneda ladina y i diretëures dla repartizions ala cultura de rujeneda tudëscia y taliana Karin Dalla Torre y Antonio Lampis. I autri cater cumëmbri ie bele unì numinei dala fundazion. L cunsëi de aministrazion messerà sën fé trëi prupostes aldò de chëles che la Jonta provinziela nciarierà l presidënt dl Museion.
Plazes dai auti dl spedel de Bulsan
La Jonta à dat pro de cumpré su la Hospital Parking Spa che à la gestion dla plaza dai auti nueva dl spedel a Bulsan per n custimënt de 4,3 milion de Euro. I assessëures à segurà che l priesc per lascé l auto sarà de 1,2 Euro al’ëura. Per i culaburadëures y vel categuries de pazienc iesen bele tl lëur de mëter a jì priejes lascei do.
Pest Paul Flora
La Jonta provinziela à fat ora deberieda cun l guviern dl Tirol de mëter su n pest dedicà al gran artist de grafica Paul Flora. L pest de 10.000 Euro ie destinà a artisć jëuni. La giuria dëssa unì metuda adum da n reprejentant dla provinzies de Bulsan, dl Tirol y dla familia Flora.
as
Galaria dales fotografies
La Jonta provinziela de Bulsan; foto USP/Pertl.
