Ambiënt | 30.12.2009 | 09:06

Cësa dl Parch naturel te Funes ie sën davierta

USP – L zënter nuef dl Parch naturel Puez-Odles a S. Magdalena de Funes ie unì sëurandat ufizialmënter (inier) ai 29 de dezëmber tres l presidënt dla provinzia Durnwalder y l assessëur Laimer. La cësa che ie unida frabicheda per 3,3 milion de Euro fej pert de n majer cunzet che tol nce ite la scola y la scolina. Tlo dëssel dantaprima unì dat nfurmazion a chiche uel zapé ite tl Parch Naturel Puez-Odles.

A S. Magdalena de Funes à la Provinzia de Bulsan fat la setima cësa dl Parch naturel. La strutura de 3200 metri cubich ie unida fata ulache ruva adum i trëi ruves de Funes. Pra l cuncors de proietazion a livel de Europa oven giapa ite 122 prupostes per chësc zënter de nfurmazion. “L Chemun à abù rejon a scrì ora n cuncors tres chël che n à pudù crì ora l’idea plu adateda per duta chësta istituzions publiches. Sën

vëijen che la cësa se prejënta a na maniera moderna da pudëi mustré ca” à dit Luis Durnwalder. La cësa dl Parch naturel, fata do i proiec de Stefan Burger y Birgit Rudacs, à doi partimënc cun n peton de culëur papyrus y nce pertes de lën. Per ti ruvé permez plu saurì nce a pe iel unì fat n puent sëura l ruf de Funes. Do avëi tenì ite la mpermetuda dla cësa dl parch à l Presidënt dla provinzia nce cunedì che n uel tosc mëter man cun la streda de zircunvalazion per S. Piere de Funes. L zënter nuef dëssa tré l nteres di jëuni per la natura a per la stravardé. Ma duta la populazion dl post, che do statistiches se nuzea puech de chësta cëses, dëssa giapé nteres y pascion per la natura. L zënter nuef dëssa vester de utl ajache la jënt se rënde plu cont dla marueies che pieta la natura te chisc raions. “Tl medemo mumënt pieta chësta cësa nce la puscibltà de mparé a cunëscer miec l patrimone naturel Unesco” à sorissà l assessëur Michl Laimer.

I doi cumëmbri dla Jonta provinziela à sëurandat na tlé simbolica a Andrea Leitner che mëina la cësa dl parch. Chësc zënter che fej referimënt al Parch Naturel Puez-Odles cun si 10.196 hectar de spersa, resta daviert nchin ala fin de merz. Ai 17 de auril uniral fat la giaurida ufiziela.

as

Galaria dales fotografies

L assessëur Laimer cun l presidënt Durnwalder sëurandà la tlé dla cësa dl Parch naturel Puez-Odles a Andrea Leitner; dlongia l ambolt Robert Messner. Foto USP/Pertl.