Aministraziun | 30.12.2009 | 11:20

Servisc levines: cooperazion, situazion y internet

USP – La feter 40 cumiscions per la levines puderà se nuzé de na culaburazion nueva danter l Servisc provinziel per la levines de Bulsan y chël dl Tirol. Sun Internet vëniel metù a desposizion truepa nfurmazions de utl. Da nuef iel nce l orar de canche l vën dat ora la nuviteies sun la situazion dl pericul de levines.

La basa per la culaburazion nueva cun la Repartizion per l Servisc zevil dl Tirol ie na plata internet. “I cumëmbri de nosta cumiscions per la levines possa tres chësta plata internet ruvé permez a truepa nfurmazions mpurtantes per pudëi tò na dezijion n cont dl pericul de levines y di pruvedimënc aldò” à spiegà l presidënt dla provinzia Durnwalder. Sun la basa internet iel la relazions sun la situazion de pericul de levines tl Tirol, Südtirol y ti Grijons, ma nce na nfurmazions n cont dla nëif y dl vënt al’auta. “De utl ie chësc sistem nuef nce ajache n possa udëi uni ajurnamënt y nscila se lascel jì do ala dezijions per saré stredes, evacuazions o sce n muessa saré purtoies dai schi” à dit Drunwalder.

Da nuef iel nce che la nfurmazions sun l pericul de levines tla Provinzia de Bulsan ne vën nia plu dates ora dala 10 danmesdì, ma coche damandà dai mëinacrëp, judacrëp, furnadoies y Servisc ala stredes, dala 4 domesdì. Chësc ajache domesdì an la previjions dl tëmp nueves. La nfurmazions sun la levines vën dates ora de lunesc, mierculdi y vënderdi.

La terza nuvità reverda la plata internet dl Servisc per la levines dla Provinzia de Bulsan, che ie unida fata da nuef y che sarà online de jené. Per se fé plu saurì n cheder sun l pericul de levines ie unì mpartì la provinzia te undesc raions. Te uni raion puderan udëi singularmënter ciun ronesc (cun espusizion a nord, est, ovest o sud) ie particularmënter periculëusc da levines.

as