Politica | 08.01.2010 | 22:36

Tlausura dla Jonta provinziela: chëutes, burocrazia y film

USP – N proiet nuef per smendrì burocrazia, na lingia de pruvedimënc per defënder l tlima, jì inant cun ntervënc contra la crisa economica, cumpetënzes nueves, reduzions de chëutes y n film fiction: chisc ie i argumënc prinzipei che la Jonta provinziela de Bulsan à tratà te doi dis de tlausura tla valeda de Ulten. Riesc daldò à l presidënt ncuei (8 jené) prejentà la dezijions de majer nteres, deberieda cun i doi vizepresidënc dla Provinzia.

Crëta y sustëni contra la crisa

La prima senteda dla Jonta provinziela tl ann nuef ie unida tenida doi dis alalongia, te na tlausura tla valeda de Ulten. „Lauron bën y zifres testemunieia la crëta dla populazion“ à dit Durnwalder fajan referimënt ai resultac dla nrescida n cont dl pensé dla jënt per via dl jì inant dla crisa economica. „De mei fova 8% di zitadins utimisć sun la tendënzes economiches, tla nrescida de nuvëmber fova bele 56% utimisć“ à detlarà l presidënt. De chësc viers se à nce muet la crëta de viers dla Jonta: „dan mez ann fova 35% per l pachetl de pruvedimënc per ti jì permez ala crisa, de nuvëmber fovel bele passa mesa la populazion“. Chësta posizions dla jënt sustën la linea di assessëures che tla tlausura à dat pro de jì inant nce tl ann 2010 cun i pruvedimënc per sustenì l’economia y stravardé i lauranc. Aldò dl presidënt cialeran de ngrandì i pruvedimënc, scumencian dala cassa ntegrazion straurdinera y l sustëni per chiche à perdù lëur. I autri pruvedimënc dai pro: nchin al 2012, 800 lueges sëuraprò (ala 1.220 che ie bele) tla pitla strutures per mëndri; sustëni per l’espurtazion, fond de rotazion, cuntribuc per de stabilità al capital, grunc per firmes nueves (BLS), na sëula cooperativa de garanzia cun 6 milion de Euro de capital de risich; tò su la garanzia per n credit de 200 milion de Euro dala Banca europea per nvestimënc, n credit che unissa dat inant dala banches da tlo ala firmes acioche les ebe plu scioldi „liquide“. Studià vëniel nce do pusciblteies de tré adum te na istituzion spezifica sciche l INPS, l purté inant y paië ora duta la pratiches che taca adum cun la crisa economica (anjeniei 45 milion de Euro).

 

Finanziamënt dl’Autonomia

La Jonta provinziela à nce rujenà dla tratatives cun l Guviern a Roma per la formes nueves de finanziamënt dl’Autonomia. La se trata dantaprima de 100 milion de Euro per la cumpetënzes nueves: „cun 40 milions dëssel unì sustenì i chemuns sun sëida cun la provinzia de Bulsan, l’autra pert, nsci Durnwalder, ie argumënt de tratatives cun Roma per curì gestions che fova nchin a sën dl Stat: RAI, Posta, Università, Conservatorio y la perjon nueva a Bulsan.

N cont de chëutes oven bele tëut demez l’IRAP, śën studieia la Jonta do pusciblteies per jì sota l 0,6% nce cun l IRPEF. „La se trata de renunzië a 62 milion de Euro (addizionale), soma che unissa curida dajan ora manco cuntribuc ala categuries tuchedes.

A Roma uelen nce fé prescion acioche vede inant normes de prëscia: la regulamentazion dl bilinguism cun recunescimënt di tituli de scola, la pruibizion de trasport de refudam cun mesuns privac, na regulamentazion nueva di cuntroi de stat (dantaprima dl igiena sanitera) y l sëurandé de strom debant da pert dl Stat ala Provinzia.

 

Europa

I assessëures à rujenà de na candidatura dl raion Euregio per deventé capitela dla cultura tl 2019. Tlo iel debujën de rujené plu avisa cun Tirol y Trënt, tenian cont de na promozion de n raion y nia de na zità singula. Da nuef uniral nce metù a jì la Repartizion provinziela per cuestions europees.

 

Smendrì burocrazia

De majera mpurtanza ie stata la descuscion de n proiet udù sciche revoluzioner per smendrì burocrazia. N rujenerà mo cun i chemuns per na nuvità tl urbanistica. Dajan sëura l scumecié de lëures unissa smendrì l lëur provinziel de cialé do cie che l vën frabicà. Cun chësta forma de dé sëura (denuncia di inizio attività: DIA) pudëssen cumedé l cuatier, lëures de manutenzion o frabiché da nuef aldò dl plann de atuazion laurà ora dal Chemun. La „DIA“ se stiza sun l prinzip che sce l chemun ne dij nia nchin 30 dis do l dé sëura, possen scumencé a frabiché.

 

Pruposta purtoies dai schi

Dat pro iel nce unì la pruposta dl assessëur Berger n cont di purtoies dai schi per straufonghes, purtoies nueves, despuscions, raporc cun provinzies a sëida.

 

Defënder l tlima

Sëuraprò ai pruvedimënc bele fai al savëi, per sparanië energia, produzion de energia alternativa, restruturazions aldò di criteries Cësa tlima y bonus de cubatura, ie unì dat pro n cuncors per management de energia tla strutures provinzieles. L fin ie chël de smëndrì 20% dl cunsum de energia. L sistem fotovoltaich unirà njenià sun 20 hectar de tëc dla cëses provinzieles.

 

Cunzescions dal strom

„Ulon tré ite l chemuns y nce la populazion dajan ora azions y obligazions a n fit fis (fix)“ à dit Durnwalder. La Jonta uel valuté la puscibltà de pité i priejes lascei do ala families, nce ala jënt che à manco l muet y ala jënt de tëmp.

 

Reforma scolastica

Aldò di assessëures ne unirà la reforma scolastica nia metuda n drova dan l ann de scola 2011/2012. Dan fé adatamënc tres na lege provinziela, uelen aspité duta la normativa y i stlarimënc da Roma. Te chësta ucajion, nsci l vizepresidënt Tommasini, saral nce ucajion per na regulamentazion nueva n cont dla furmazion prufesciunela.

 

Imigrazion

A n bon pont iesen ruvei n cont dla lege provinziela sun l’imigrazion che traterà l ruvé adalerch, l mparé la rujenedes, i servijes soziosaniteres, l cuatier, la scola, l ruvé do de d’autri de familia, l’intergrazion.

 

Film cun Terence Hill

L ie unì cunscidrà la pruposta dla Lux Vide, per na produzion de na pitla serie RAI tla provinzia de Bulsan. Atëur prinzipel fossa Terence Hill che fajëssa na sort de salvan. „Per nëus fossel na promozion mpurtanta dl raion, nia me a livel naziunel ma nce a nternaziunel“ nsci Durnwalder.

 

Mubilità

Per garantì culegamënc publics uni 30 menuc uniral stlut ju l program de stazions y taché adum de trasporc per n custimënt de 100 milion de Euro. Bonamënter uniral ne fat ne reforma dla tarifes che ie al mumënt veramënter a bon priesc. Durnwalder à fat l ejëmpl dl viac da Sterzing y Bulsan che costa me 1 Euro, n priesc nia plu realistich per l daunì.

as

Galaria dales fotografies

Doi dis de tlausura per la Jonta provinziela de Bulsan;