Atualità
Cuatieres: adatà la sëida de davani y somes da tré ju
USP – Per via dl custimënt de vita che ie auzà, à la Jonta provinziela adatà i criteries per ruvé permez a cuatieres soziei. Aldò dla pruposta dl assessëur de cumpetënza Christian Tommasini iel nce unì adatà i criteries per n sustëni l prim cuatier.
Danter setëmber 2008 y setëmber 2009 à l Istitut provinziel de statistica ASTAT muserà che l custimënt de vita ie auzà de 0,3 percënt. Sciche udù dant per lege provinziela à la Jonta provinziela azetà la pruposta dl assessëur Tommasini de adaté nce la sëida de davani, la somes da tré ju y la categuries de davani. Per la dumandes che unirà dates ju danter l prim de mei 2010 y la fin de auril 2010 uniral tëut n cunsciderazion l davani dl ann 2009.
Per giapé n sustëni a frabiché l prim cuatier, a fé ora n cuatier te na vedla cësa o al cumpré ie la sëida de davani unida auzeda a 20.100 Euro per la prima categuria (mpede 20.000 Euro), 27.100 Euro per la segonda categuria (mpede 27.000 Euro), 32.500 Euro per la terza categuria (mpede 32.400 Euro), 28.900 Euro per la cuarta categuria (mpede 28.300 Euro) y 50.200 Euro per la cuinta categuria (mpede 50.000 Euro). Chiche fej dumanda cun n davani nchin a 20.100 Euro possa giapé nchin a 10 ponc. Me un n pont giapa chiche à abù n davani danter 44.500,01 Euro y 50.200 Euro.
La sëida de davani per n cuatier soziel IPES n afit vën auzeda da 14.950 Euro a 15.000 Euro. Te chisc caji giaten nchin a 10 ponc sce n à n davani nchin a 6.200 Euro y un n pont cun n davani danter 14.000,01 y 15.000 Euro.
Da nuef iel nce che per l uem o la fëna possen tré ju 11.100 Euro (mpede 11.050). La somes da tré ju per i mutons ne vën nia mudedes (4.000 Euro per l prim fi, 4.500 Euro per l segondo y 5.400 dal terzo inant) . Per genitores che tira su dassëui si mutons iel unì auzà la soma da tré ju da 7.550 a 7.600 Euro.
La soma da tré ju per l avëi de genitores, joceri o mutons ie unì auzà da 745.550 a 747.800 Euro.
as
