Atualità
Damandé cuntribuc per la cultura ladina per l ann 2010
USP – Per ativiteies cultureles, artisc’ o ativiteies de furmazion n generel ti ciamp dla cultura ladina possen nchin ai prim de fauré 2010 damandé cuntribuc dala Provinzia de Bulsan. L assessëur ladin Florian Mussner y la Cunsulta culturela per la grupa de rujeneda ladina fej al savëi che la dumandes possa nce unides dates ju diretamënter a Urtijëi, Badia y Al Plan ntan udienzes spezieles.
N aiut speziel per damandé cuntribuc culturei pieta nce chëst ann l Uifze provinziel per la Cultura ladina: i culaburadëures provinziei unirà nstësc ti luesc ladins per pië do la dumandes de cuntribuc. “Tres chësc servisc ti luesc, possa i respunsabli dla lies, artisc y istituzions mo damandé do stlarimënc de persona” sorissea l assessëur Mussner. L servisc vën tla Val Badia pità n vënderdi, 22 de jené tl Chemun de Badia (domesdì, dala 5 ala 7) y l mierculdi ai 27 de jené tla Cësa de Chemun a Al Plan (dala 4 ala 6 domesdì). Respunsabli de ativiteies cultureles ladines de Gherdëina possa dé ju la dumandes l vënderdi ai 29 de jené tla Cësa de Chemun de Urtijëi (domesdì, dala 5 ala 7).
La dumandes per cuntribuc provinziei possa nce unides mandedes ite tres posta, al Ufize cultura y scola ladina dla Provinzia de Bulsan, streda Binder 29, 39100 Bulsan.
I formuleres per fé dumanda giaten nce sun la plata internet www.provinz.bz.it/cultura-ladina o tl Ufize cultura y scola ladina a Bulsan, numer de telefonn 0471-417020/10.
La dumandes de cuntribuc per nvestimënc tl ciamp dla cultura ladina, possa alincontra unì dates ju ntan dut l ann.
as
