Atualità
Cëses dl Parch naturel daviertes per l inviern
USP – Cun mostres spezieles y atrazions nueves a cater cëses dl Parch naturel scumencià si sajon da inviern. Doi zëntri reverda i parcs naturei tl raion ladin: l parch Fanes-Sennes-Braies a Al Plan de Mareo y la cësa nueva a S. Magdalena de Funes per l parch Naturel Puez-Odles. Giaurì à nce la cëses di parcs a Sand in Taufers y a Toblach.
La cëses di parcs naturei ie dutes defrëntes, ma l cunzet ie for l medemo: na mostra permanënta, ciantons da liejer per mëndri, microscops y d’autra njinies per scuvierjer la natura plu da daujin y n sistem de nfurmazion computerisà sun duc i set parcs naturei.
Tla Cësa dl parch naturel Fanes-Sennes-Braies iel unì njenià na mostra speziela dedicheda ai musc de na cuntreda. Da udëi iel 18 modiei de scultures che ie unides fates per n cuncors dl Ufize provinziel per i parcs y Unika n ucajion di 30 ani dl parch naturel. Sëuraprò possen cun n simulator de jol ti cialé ai parcs naturei dl Südtirol da sëura ju.
Permò dan trëi enes iel unì giaurì la cësa nueva dl parch naturel Puez-Odles. Per via dla cuntreda unica de chësc parch iel unì dedicà na mostra ala geologia: sun na gran fotografia fata dal joler, possen nstës jì sëuravia y udëi plu da daujin la cuntreda.
Chësta cëses di parcs naturei resta daviertes nchin ai 31 de merz, dal merdi ala sada, dala 9.30 nchin ala 13.30 y dala 16.00 ala 19.00. L’ntreda ie debant y sun dumanda vëniel nce pità vijites menedes. Nfurmazions mplu ie nce da abiné sun la plates provinzieles tl internet (www.provinz.bz.it/naturparke). La sajon da instà scumencerà pona ai 4 de mei.
as
