Atualità
Lege sun l frabiché alesirà: majer sustëni per dëibli
USP – La mudazions ala lege sun l frabiché alesirà ie unides dates pro te Cunsëi provinziel: chësta arjonta ie aldò dl assessëur Christian Tommasini che ova njenià la pruposta, de gran valor. Per l assessëur ie la nuviteies dantaprima de utl per pudëi se adaté plu riesc a esigënzes nueves. A chësta maniera possel unì sustenì de plu chiche ie economicamënter dëibli y la tlas de davani mesan.
L prim articul dla lege omnibus che ie unida data pro inier (13 jené) dal Cunsëi provinziel de Bulsan cumporta nuviteies per na pert dla lege sun l frabiché alesirà. I programs per frabiché jirà plu debota y i chemuns à giapà n majer pëis. “Leprò vën l sustëni per la tlas de davani mesan y per chiche ie economicamënter dëibli, dataprima chëi che ie unic tuchei dala crisa economica” spiega l assessëur Tommasini.
I ponc de majera mpurtanza ie cinch. N iede se tratela de realisé plu debota i programs dl frabiché soziel deberieda cun i chemuns. Per arjonjer chësc iel udù dant acurdanzes per mëter a desposizion i grunc, cuncorsc per cumpré cuatieres tres l Istitut per cuatieres soziei IPES o tres d’autra urganisazion zënza fin de davani. Aldò dla lege mudeda possa 30% di cuatieres unì cumprei sun l marcià liede, ma me aldò dl valor cunvenzionel che ne possa nia vester plu de 2.300 euro al meter cuadrat.
L segondo pont reverda i pruvedimënc de aiut per chiche à perdù l lëur per via dla crisa economica o che ie ruvei te cassa ntegrazion. Ëi vën judei a paië la rates de si credit per l cuatier. “Chësc ie n pont zentrel tl cumbater la cunseguënzes dla crisa” sorissea l assessëur.
La terza majera nuvità ie chëla che n cëla de nuzé deplù de vedla cëses. “Chësc ne ie nia me de utl per valorisé i zëntri di luesc, l juda nce a sparanië grunc ti luesc” dij l assessëur. N autra nuvità ie nce l sustëni per n cuatier fat ora da nuef che possa pona unì afità. L patron possa me fité chësc cuatier a chiche tën ite la cundizions y chël al fit provinziel. L cuinto pont nuef reverda l recunescimënt de cumuniteies de vita, nce sce nia maridei.
as
