Atualità
Sculeies zipla a Urtijëi tla dlacia
Usp – I sculeies dla Scola Prufesciunela y dla Scola d’ert zipla chisc dis tla dlacià per n cuncors a Urtijëi. Scoles, lia turistica y chemun lëura te chësc proiet deberieda per sustenì l atività de nseniamënt y per pité l medemo mumënt n’atrazion artistica tl zënter. La premiazion vën tenida duman vënderdi ai 15 de jené.
L’argumënt dl cuncors ie chëst ann la Dolomites, nosc crëps n referimënt ala recunescënza dl Unesco. Feter 20 sculeies dla Scola pufesciunela per l’artejanat artistich y dla Scola d’Ert zipla ntan chëst’ ena de ndut cin figures de dlacia. Nuvità da chëst ann iel che la figures de dlacia unirà de nuet nce luminedes. Per chësc cuncors an fat unì adalerch feter 20 metri cubich de dlacia, cossa che ie stata mesun tres l’urganisazion dla Lia turistica de Urtijëi cun n finanziamënt dl Chemun de Urtijëi.
“L ie bele l otavo ann ndolauter che pudon fé chësc cuncors, che ie l sëul per figures de dlacia te dut Südtirol” spiega l diretëur dla Scola prufesciunela Julius Senoner. I ani passei iel for inò suzedù che la scultures de dlacia ie unides ruinedes da jënt. Per chësta rejon an chëst ann fat i modiei a na maniera plu sterscia.
La premiazion dl cuncors unirà tenida duman, vënderdi 15 de jené dala 5 domesdì sun la pitla plaza S.Antone a Urtijëi. Na cumiscion metuda adum da artejans, buteghieres y hotelieres valuterà ntant i trëi miëur lëures.
Per l nseniamënt dla materies artistiches ie la speriënza de ziplé tl zënter, danter la jënt, n arichimënt mpurtant. Ntan l’ultima ena de jené jirà sies sculeies dla Scola prufesciunela a Seefeld tl Tirol per n cuncors de ziplé tla nëif danter scoles. La medema ena jirà na grupa nce a S.Martino di Castrozza per n cuncors nternaziunel de ziplé tla nëif.
Cie che l vën zënza mo nsenià tla Scola prufesciunela a Urtijëi puderà un un udëi ntan i dis de porta davierta ai 12 y 13 de merz.
as
