Atualità
Deguna scadënza per l bonus de cubatura per ressanamënc energetics
USP – Te chëla che l Cunsëi provinziel de Bulsan à dat pro la lege omnibus ie per ressanamënc energetics unì tëuta demez la scadënza per l bonus de cubatura. “Te chëla che ie unì tëuta demez la scadënza ala fin dl 2010 possa i ressanamënc y l adurvé dl bonus unì fat zënza prescion dl tëmp” nsci l assessëur Michl Laimer.
L bonus de cubatura ne ie nia me nasciù cun l fin stravardé l tlima, ma nce per dé na sburdla al’economia. Per chësta rejon fovel unì metù na scadënza ala fin dl ann 2010. Chësta scadënza ie unida tëuta demez a na maniera che l bonus premia duc chëi che fej n ressanamënt energetich dla cësa.
L bonus de cubatura giapa duc chiche porta na vedla cësa al livel de na cësa tlima “C”. Chël uel di che per sciaudé val te n ann me plu debujën de 70 kilowattëura per meter cuadrat. L bonus vel nce per cëses cun de plu families, sce les vën ressanedes aldò. “Te chisc caji vëniel dat l mesun de ngrandì l cuatier te chëla che i śoldri possa unì stlui su” spiega l assessëur provinziel al ambient.
N’ezezion da l bonus de cubatura nce n cont dl’autëza dla cësa. Per se nuzé dl bonus de cubatura possen auzé la cësa nchin a n meter deplù de chël che l ne ie udù dant dal chemun. “Ma nce cun l frabiché ora l bonus de cubatura muessen sté de zes dala sëides, sciche udù dant dai regulamënc” dij Laimer.
Na regulamentazion nueva iel nce unì dat pro te caji de cunvenzionamënt dl toch de cuatier ngrandì. Sce l vën ngrandì n cuatier per chël che n à giapà cuntribuc, pona vel l cunvenzionamënt nce sun l toch nuef. Sce l se trata de n cuatier liede, resta nce l toch nuef zënza cunvenzionamënt. “Me sce tres l ngrandimënt vëniel fat n cuatier nuef, muessa chësc a un maniera unì cunvenzionà” spiega l assessëur provinziel.
as
