Atualità
Ti parcs naturei vëniel cris assistënc per l instà
USP – Per chësc instà vëniel cris 20 assistënc per i parcs naturei dla Provinzia de Bulsan. L Ufize provinziel per i parcs naturei mët d’ansciuda a jì n curs per chësc lëur che fossa pona da fé da lugio nchin de setëmber. Nteressei a cësta ncëria possa se nunzië nchin ai 5 de merz.
La ncëria prinzipela di assistënc di parch ie chëla de pité nfurmazion di raions sota scunanza, te chëla lueges ulache la majer pert dla jënt zapa ite tl parch. La se trata de spieghé la particulariteies naturalistiches dl parch, i fins di raions sota scunanza y nce cië che n possa fé n te n parch y cië che ie pruibì. Tres la spiegazion dëssel unì descedà de plu cumprenscion di vijitadëures per la natura y l ambient, spiega Artur Kammerer, diretëur tl Ufize provinziel per i parcs: “I assistënc vën udui de bon uedl dala jënt, chësc taca adum cun l servisc de nfurmazion che judà a astilé ora straufonghes per ejëmpl per via de lascé l auto”.
Per chësc lëur possa se nunzië duc i pasciunei de natura sëura 18 ani che à de bona cunescënzes natureles y tl ciamp dla defendura dla natura y cuntreda. Damandà vëniel nce de se fé saurì a tò su cuntat y de avëi nce capaziteies pedagogiches. Chiche ulëssa deventé assistënt dl parch naturel muessa avëi l ejam de bilinguism “C” y viver daujin a n parch.
Per sëurandé la 20 ncëries uniral fat n test per udëi la capaziteies damandedes di candidac. Per pudëi pië do la ncëria muessen fé pea l curs che ie prugramà per la cuarta ena de mei y la segonda ena de juni.
La dumandes scrites muessa unides mandedes ite nchin ai 5 de merz al Ufize provinziel per i Parcs naturei a Bulsan, (tel. 0471 417770), streda Ritten 4. Tlo iel nce da giapé nfurmazions plu avisa y formuleres. L medem vel nce per la sëntes destachedes de Maran, Burnech (plaza de chemun 10, tel. 0474 582330, de lunesc y mierculdi danmesdì), a Al Plan de Mareo, (streda Catarina Lanz 96, tel. 0474 506120, de lunesc y mierculdi danmesdì) y de Welsberg.
as
