Atualità
Vënderdi ai 22 gëura la mostra dla cuntreda mudeda a Urtijëi
USP – Do centenëis de gheneda tla cuntreda a Urtijëi iel ntan l’ultima generazions stat de gran mudazions. Cie che se à mudà plu avisa ntan i ultimi 60 ani iel unì analisà te n proiet universiter cun sustëni provinziel. Duman, vënderdi 22 de jené uniral dala 6 da sëira giaurì la mostra dl proiet tla Cësa de Cultura de Urtijëi.
Co che la cuntreda dumineda dala persona se à mudà a Urtijëi dal 1950 a ncuei ie unì analisà dal Istitut de Geografia dla Universià de Dispruch n culaburazion cun la Repartizion provinziela per natura y cuntreda. Per centenëis iel stat l lëur da paur à ti dé l cialé ora ala cuntreda, pona an adurvà lën per ziplé y pona ie mo ruvà l turism. Do doi ani de nrescida vën i resultac śën prejentei tres n parëdl de fotografies (inier y ncuei), na valutazion dla statistiches y na reprejentazion cartografia. Coche chisc resultac dla nrescida per Urtijëi cëla ora plu avisa possa uni un jì a ti cialé te na mostra che gëura duman, vënderdi 22 de jené dala 6 da sëira tla Cësa de Cultura.
L proiet de nrescida curà da Christine Wanker da Bula y da Alexander Dusleag ie unì fat sun de ndut diesc luesc dla provinzia de Bulsan: Toblach, Ahrntal, Persenon y Renon per la pert a est, Mals, Martell, Naturns, Schenna y Kaltern per la pert a vest dl Südtirol. Urtijëi ie l sëul luech ladin. Velch de plu ie nce publicà tl internet sota www.uibk.ac.at/geographie/projects/kls.
La mostra sun la cuntreda mudeda a Urtijëi sarà davierta dal lunesc ala sada, dala 8.30 ala 12.30 y domesdì dala 14.30 ala 18.30, tla Cësa de cultura. La mostra resterà davierta nchin ai 10 de fauré.
as
