Atualità
Marcià dl lëur: la crisa à l’ann passà me tucà vel ciamps
USP – La crisa economica mundiela à tla provinzia de Bulsan me tucà vel ciamps, dantaprima l frabiché y la laurazion. Chësc vën mustrà su dala nrescides che l Servisc provinziel de usservazion dl marcià dl lëur à fat ntan l instà y auton dl ann passà. Chisc dac ie publichei tl’edizion nueva de "Arbeitsmarkt News".
Tla cumpëides de chëi che à abù da lëur danter mei y utober 2009 iel stat n aumënt de un percënt permez al ann dant, spiega Helmuth Sinn, diretëur dla Repartizion provinziela per l lëur. Purempò iel da tenì cont che l svilup ie scialdi plu dëibl permez ai ani dant. “Te chisc ani ie la cumpëida di lauranc sota patron auzeda n media de doi nchin trëi percënt” dij Sinn. Che l ie unì ora n aumënt nce sce on abù crisa, ie aldò de Sinn, merit di pruvedimënc. “Mpede lascé jì truep lauranc, an pudù scurté la stiera a mez tëmp o se nuzé de autri pruvedimënc” spiega l diretëur de ufize.
La crisa ie unida sentida l plu dal ciamp dla laurazion y dl frabiché. “Bele dl 2007 à metù man na crisa l ciamp dl frabiché. Tlo an dal scumenciamënt dl 2008 nchin ala fin dl 2009 perdù 1200 stieres” dij Sinn. Chësta cumpëida fej ora da sies a set percënt di lauranc sota patron te chësc ciamp de lëur. L ciamp dla laurazion ie la stieres permò caledes dal 2008, ma te tëmp de n ann à la crisa tucà 1000 lauranc, che ie passa l trëi percënt.
Tla gastronomia y tl’agricultura iel ntan l instà y autonn 2009 stat n svilup positif. L instà 2009 ova scumencià mel per la gastronomia, ma pona iel mpomo stat n aumënt danter trëi y cin percënt. “A chësta maniera sons ruvei sun la zifres di ani passei y l inviern a scumencià bën” sorissea l diretëur de ufize. Tl cumerz se an ënghe stentà tl prim, ma pona se an refà plu inant. Nscila iel nce stata tl ciamp di servijes.
I tuchei dala crisa ie dantaprima ëi che vën da oradecà. La majera pert dl’ëiles che à perdù l lëur ie de naziunalità taliana che à perdù na stiera a tëmp plën. Ntan l instà y autonn ie dal’autra pert auzeda la cumpëida dla laurantes de naziunalità taliana che à na stiera a mez tëmp y la dependëntes da oradecà.
as
