Atualità
Auguresc a Carolina Kostner per l titul europeich da Durnwalder
USP – Per l terzo titul europeich de jadiné artistich à l presidënt dla Provinzia Durnwalder mandà auguresc a Carolina Kostner. “Kostner arjonc for inò bedaies y ie n ambasciadëura per l Südtirol” nsci l presidënt dla Provinzia, che vëij tl’atleta de Urtijëi n ejëmpl per chël che n possa arjonjer cun talënt y lezitënza.
A Tallinn à Carolina n sada venciù si terza bedaia d’or di campiunac dl’Europa y ie a chësta maniera una dl’atletes dl Südtirol de majer suzes. “Sun Carolina possen se lascé” à dit Durnwalder che ti à mandà al atleta de jadiné i miëur auguresc per l titul arjont. “Nosc jëuni tl sport possa se tò n ejëmpl da Carolina Kostner, ajache ëila nes testemunieia dai ani cie che se lascia arjonjer cun talënt, lezitënza y se dé da fé” à dit Durnwalder.
Do chësc suzes se mbincia l presidënt dla provinzia che la bedaia d’or de Carolina possa purté fertuna per i juesc olimpics che scumëncia te puecia enes a Vancouver, ma no me per ëila nstëssa, ma nce per duc i partezipanc dla provinzia de Bulsan.
as
