Atualità

Aministraziun | 25.01.2010 | 16:01

Jonta provinziela: njonta per la stieres publiches ladines

USP – La Jonta provinziela de Bulsan à ncuei dat pro che culaburadëures dl’aministrazions publiches che adrova la rujeneda ladina dëssa giapé na njonta tl paiamënt. Tla senteda da ncuei (25 jené) ne à nia plu tëut pert l assessëura Barbara Repetto ajache la Suneria de cassazion à detlarà che la ne ëssa nia pudù se mëter sun lista per l Cunsëi provinziel.

Njonta per la rujeneda ladina

Culaburadëures de aministrazions publiches che adrova la rujeneda ladina dëssa giapé na njonta de 11% de si paiamënt de basa. Chësc reverda ufizies che pieta si servisc tla rujeneda ladina. Per giapé chësta njonta muessa i culaburadëures avëi fat l ejam de bilinguism te duta la trëi rujenedes provinzieles. Chësc reverda i ufizies di 8 chemuns ladins plu la frazions ladines da Ciastel, l Istitut culturel Ladin, l Istitut Pedagogich y i ufizies provinziei cun la sëntes a Roma y Brüssel.

Ai 3 de fauré assessëur nuef

Tla senteda de Cunsëi provinziel ai 3 de fauré fejen cont che Roberto Bizzo fajerà l giuramënt y riesc do puderal nce unì lità tla Jonta Provinziela. Tla cunferënza stampa riesc do la senteda dla Jonta provinziela à l presidënt Durnwalder desmustrà si desplajëi per l macë de Barbara Repetto. “Ëila ie stata na bona assessëura, cun spirt de inuvazion y cun na bona preparazion. Cun ëila on abù na bona culaburazion, perchël iel stat na gran pierdita. “Messon respeté la sentënza dla suneria de cassazion nce sce la suneries tla doi istanzes da dant ova dat rejon a Repetto” à dit l presidënt la provinzia. Ncuei à Durnwalder sëurantëut la cumpetënzes de Repetto. Sce duta si cumpetënzes vën piedes do dal assessëur nuef ie cossa l Partit democratich. “La cumpetënzes ie unides marciadedes danter i partner de coalizion, perchël iel nce cossa dl partit PD sce i uel se tenì la valivanza di dërc. Sce i uel la dé de reviers ne giaterai lessù degun’ autra cumpetënza.” à spiegà Durnwalder.

Furmazions di maestri de schi

Duc i maestri de schi dëssa fé unfat furmazion danora. La Jonta provinziela à fat ora che nce i maestri de snowboard y de podejé muessa fé 90 dis de furmazion sciche i maestri de schi alpin.

Terme de Maran

La Provinzia de Bulsan, patrona dla Terme de Maran uel vënder l hotel che toca leprò. L unirà scrit ora n cuncors nternaziunel ulache n se damanda 30,6 milion de euro per chësta strutura. L presidënt fej cont che l unirà pità n priesc plu aut y perchël sauteral ora na gran soma per la Provinzia. La Jonta provinziela à fat ora che de nciarië n reprejentant tla sozietà dla Terme de Maran, che ie 100% de avëi provinziel.

Cëses per studënc

La Jonta provinziela à fat n cheder sun l bujën de plazes tla cëses per sculeies dla scoles autes. L majer bujën iel a Maran ulache sëuraprò ala 743 lueges mance mo na lerch per 120 sculeies. Pra la scola dl sport a Mals uelen frabiché ora dla vedla caserma y pité lerch a 100 sculeies. Per la scola agrara Fürstenberg de Mals ie debujën de lerch per 90 sculeies sëuraprò. N majer bujën de plazes iel nce a Auer ulache l mancia mo per 100 sculeies, a Burnech macel mo lerch per 44 sculeies y a Persenon 10 sculeies.

Tarifes per jënt de tëmp

La Jonta provinziela à tratà l argumënt che l vënie lascià do l priesc de tarifes ala jënt de tëmp che muessa ciafië cun na pitla pension. Per l priesc dl strom an mo dificulteies sun i criteries de selezion per chi che dëssa giapé la miëura tarifes. L muessa unì desferenzià aldò dla situazion finanziela y l avëi. Una puscibltà pieta l Stat per chiche tira na pension cun manco de 7500 Euro al ann, ma chësta puscibltà muess mo uni cialé plu avisa tal proscima sentedes.

N cont dla tarifes dal’eghes y refudam possa i chemuns bele udëi dant categuries per jënt de tëmp che à na pitla pension. Tl cajo dl refudam de daussa perchël l’autra pert dla populazion nia messei paië de plu.

130 pusciblteies de practicum

A sculeies dla scola auta sëura 18 ani y studënc universiteres ti vëniel dat la puscibltà de fé pratica ti ufizies provinziei. I assessëures à dat pro 130 stieres de pratica per i trëi mënsc d’instà. Studënc sota 18 ani giapa 30 euro al di, studënc sëura 18 ani 40 euro al di. Per n practicum tla sëntes destachedes a Roma y Brüssel giaten 50 euro al di. “Dajon chësta puscibltà acioche i studënc possa avëi n prim cuntat cun i ufizies dl’aministrazion provinziela.

N ann deplù per chiche à perdù lëur

La Jonta provinziela à damandà che a chiche à perdù l lëur ti vëniel slungià de n ann i aiuc dla Cassa ntegrazion y dla Cassa de mubilità. Aldò dl’ultima tratatives cun l Guviern a Roma fossa chësc de cumpetënza provinziela, ma la desposizions aldò ne ie mo nia unides stlutes ju. “Son dla minonga che la crisa economica ne ie mo nia passeda y perchël saral mo n pez jënt zënza lëur” à dit Durnwalder.

Naziunela tudëscia tl Südtirol

La Federazion tudëscia de juech al palé prejenterà a Stuttgart si dis de preparazion a Kaltern per i campionac dl mont. Pra chësta cunferënza stampa prejenterà Durnwalder l Südtirol.

Cuatieres per dependënc dla Milkon

A Kampill, pra la sënta dla Milkon ie unì damandà de frabiché cuatieres per feter 20 dependënc dla Milkon cun leprò n pitl zënter per i mëndri. La Jonta à dat pro chësta dumanda a cundizion che tl zënter vëniel nce tëut su mëndri che stà ti raions daujin.

Cunzescions dal’ega

Duta la 13 dumandes per cunzescions dal’ega tla valeda de Puster y danter Sterzing y Franzensfeste ne ie nia unides azetedes. La Jonta provinziela a giustificà chësta dezijion tres chëla che te chësc raion ne dëssel nia unì fat zentreles dal strom nueves. La cunzescions per l raion de Persenon unirà mo tratedes tla proscima sentedes.

Mostra "Formaforum"

Per la fin dl instà uniral metù a jì na mostra dedicheda al’inuvazion y design tla strutura Ex-Alumix a Bulsan. L custimënt udù dant y dat pro ie de 170.000 euro.