Atualità
Plu paiamënt per i ladins tla stieres publiches
USP – La njonta de paiamënt per adurvé la rujeneda ladina te stieres publiches che la Jonta provinziela à dat pro ncuei, 25 de jené, reverda i ladins che à l ejam de rujeneda. “A chësta maniera ulons sustenì duc i culaburadëures ladins tla Provinzia, valorisan tl medemo mumënt identità ladina” spiega l assessëur Florian Mussner.
Tla Provinzia de Bulsan lëura 533 culaburadëures ladins. La njonta de paiamënt per la padronanza dla rujeneda ladina giapova nchin a sën bele chëi che lëura te istituzions ladines sciche la repartizion provinziela per la Scola y Cultura, ufizies provinzei che pieta n servisc per ladin, l Istitut Culturel ladin, l Istitut pedagogich ladin o i chemuns ladins. La njonta univa ti ufizies che ne ie nia tla istituzions ladines, paieda ora aldò de tant che i adrova la rujendea ladina.
La Jonta provinziela à śën dat pro che chëi che lëura te chisc ufizies y pieta servisc ala populazion ladina, giape la njonta plëina. Per giapé 11% de plu dl paiamënt de basa, muessen avëi l ejam de rujeneda recunesciù dal Stat.
L servisc publich tla rujeneda ladina, ie de valor per mantenì y dé forza ala identità ladina. Per pië do na stiera publica muessen tla provinzia de Bulsan mustré su de savëi l tudësch y l talian. “La padonanza dl ladin, a usc o per scrit, ie na cumpetënza y n valor sëuraprò che muessa unì recunesciù nce n cont de paiamënt” spiega Mussner.
as
