Sanité / Sozial | 26.01.2010 | 11:58

Duné sanch uel dì salvé vites

USP – L assessëur provinziel ala sanità, l primar dl servisc de trasfujion y presidënc dl Avis à ncuei danmesdì (26 jené) nvià la populazion a duné sanch. Aldò dl program dl sanch iel tla provinzia de Bulsan chëst ann debujën de 26.000 uniteies de sanch. Davia che l bujën devënta for majer iel nce for inò debujën de dunadëures nueves.

Tla provinzia de Bulsan an tan de persones che à dat ca n pue’ de si sanch an na maniera che i spedei ciafieia y ne muessa nia fé unì sanch da oradecà. “La dunazions possa me unides fates nchin a 65 ani, perchël iel for debujën de dunadëures nueves” spiega l primar dl Servisc de trasfujion Oswald Prinoth de Sëlva. Per chëst ann fejen cont de adurvé 26.000 uniteies de sanch. Aldò dl assoziazion AVIS iel ntan l an passà stat 17.096 persones che se à dat ca per judé d’autri. Nchin te doi ani se an tëut dant de ruvé a 19.000 dunadëures per ciafië cun l’esigënzes nueves.

La situazion de dunazions, laurazion, spartizion ie unida purteda a n miëur livel permez ala situazion naziunela. Doi terzi dla populazion adrova dant o do sanch dunà, plasma de sanch o medejines che ie unides fates cun prudoc dl sanch. Dla populazion dla provinzia de Bulsan danter 18 y 65 ani che possa duné sanch, iel 4,8% che dà nce ca de si sanch. A livel naziunel iel me de 3,97%.

“Sanch vën dunà debant da ulenteres. Rengrazion perchël de cuer per si dunazion che ie n’azion de gran solidarietà” à dit l assessëur ala sanità Richard Theiner. Che la vede tan bën ie da rengrazië ala bona culaburazion danter l Assessorat provinziel, l Servisc de trasfujion y l’assoziazion AVIS.

Nce sce ti spedei vëniel for fat de plu ativiteies che se damanda sanch iel mpomo stat mesun ciafië cun unfat truep sanch. Chësc davia che ultimamënter iel stat mesun miuré dassënn la cumpetënza y la cunescënzes tl manejé l sanch dunà. Resultat dla bona situazion tla gestion dl sanch ie nce l’urganisazion dla set stazions trasfujioneles tla provinzia de Bulsan. I dunadëures possa daniëura jì te chësta stazions a fé la dunazion ulache i à nce duta l’assistënza di dutores. La stazions ie tl spedei de Bulsan, Burnech, Persenon, Maran y nce a Sterzing, Innichen y Schlanders.
L sanch dunà vën pona mandà tla zentrela de Bulsan ulache l vën laurà y dadedò inò mandà ora tla stazions periferiches. I dutores giapa for inò ajurnamënc da specialisć a na maniera da nuzé l miec puscibl l sach dat ca.

La mpurtanza dl duné sanch ie ntan la cunferënza stampa nce unida sorisseda dal atleta Denise Karbon tres n video tla trëi rujenedes.

as