Atualità
Di de lecort al Olocaust, Durnwalder: nseniamënt per l daunì
USP – 65 ani do la fin dl Olocaust ne possa nia sfanté l lecort al massacher di judieres, nemics militeres y politics ti lager nazisc’. “I testemonesc che à mussu fé pea chëi tëmps de grandiscimi patimënc vën do y do a mancë, ma si arpejon muessa unì tenida n vita” nsci l presidënt dla provinzia Durnwalder per l di de lecort al Olocaust (duman) ai 27 de jené.
L Olocaust, nsci Durnwalder, ie n cont de tëmp for plu dalonc, ma chël che l nes nsënia ie for de atualità. “A deguna persona ne ti possel unì tëut la denità de vester persona, deguni ne possa valëi demanco” nsci Durnwalder che spiega che la na se trata nia de a teoria ma de n nseniamënt che muessa unì vissù di per di da duc canc. La basa per viver deberieda tla pesc ie la toleranza zënza tenì cont da ula che n vën y dl culëur dla pel. “Messon ti lascé a uni un la lerch per se svilupé, messon nce ti pité l mesun per arjonjer chësc, ma messon nce se cruzië che deguni ti tole chësta lerch a d’autri” nsci l Presidënt dla Provinzia.
N segondo nseniamënt ie chël de sustenì l snait zevil. “L Olocaust ne ie na me stat n lëur de delincuenc, l ie stat puscibl ajache la cumenanza à cialà demez” dij Durnwalder che fej n apel ala jënt: “L ie l duvier de uni un de ntervenì sce l vëij che persones vën sburdledes sun na pert o che l ne vën nia respetà si denità.”
Durnwalder sorissea nce che tla destanza de tëmp vën a macë i testemonesc. “L ie nosc duvier, chël dla scola y di genitores de dé inant ala generazions che vën do la storia dl Olocaust y l nseniamënt che l nes dà. Dut chësc ajache velch da de tel ne possa nia unì a se l dé mo n iede”.
as
