Atualità
Ai 4 de fauré diploms per manager jëuni
USP – Sota l inuem JAM, che miena "Junior Assistant Manager" vëniel tla scola prufesciunela per l artejanat y ndustria a Bulsan pità na furmazion per manager jëuni. Do avëi fat 500 ëura de nseniamënt sëurandarà l presidënt dla provinzia Durnwalder ai 4 de fauré i diploms dla furmazion JAM.
Gestion di culaburadëures, furmazion dla persunalità, marketing, economia aziendela, controlling, lëur de proiet: chisc ie i argumënc prinzipei dla furmazion per manager jëuni. L nseniamënt per deventé "Junior Assistant Manager" ie sun fundamënta pratica y anjinia ca i jëuni a sëurantò la gestion de pitla firmes o firmes de mesura mesana. I nsenianc vën dala provinzia de Bulsan, Svizra y Austria. L nteres di jëuni per chësta furmazion ie tan grant che ann per ann giapa me i mec la lerch da fé pea.
Cun na zeremonia finela, iel chëst ann 18 manager jëuni che fina via si furmazion. Chësta sarà n juebia ai 4 de fauré, dala 19.00 tla Scola prufesciunela per l artejanat y ndustria a Bulsan, tla streda Roma. I diploms unirà sëurandai dal presidënt dla provinzia Durnwalder y dala mprenditëura dl ann, Margherita Fuchs von Mannstein. I manager jëuni prejënterà te chësta ucajion si lëures per respuender ala dumanda “Cie porta pa suzes a grupes de lëur?”. I lëures ie unic fai sun basa de na nrescida de 100 ulenteres dla Crëusc Blancia.
as
