Atualità
Manco burocrazia per dërc dal’ega y nuzé l ciaut da fonz su
USP – Per feter 2500 patrons de vedla cunzescions dal’ega iel na bona nutizia: si dërc che ëssa dassù tumé cun la fin dl 2009 ie unic slungëi de 20 ani. “A chësta maniera possel unì adurvà l’ega zënza che i patrons muessa se cruzië de giapé la cunzescion da nuef” spiega l assessëur provinziel Michl Laimer. La Provinzia de Bulsan vën nce ancontra canche la se trata de nuzé l ciaut da fonz su.
La basa per slungë la cunzescions dal’ega ie la lege nr. 2 dl 22 de jené 2010. Aldò de chësta lege vën la cunzescions slungëdes automaticamënter. I patrons se sparania a chësta maniera la registrazion dl’eghes y de fé dumanda. Tl’aministrazion se sparanien nce l lëur cun la dumandes y n possa se de ju cun dumandes nueves per adurvé l’ega.
Manco burocrazia iel nce n cont de pudëi furé ju te fonz per nuzé l ciaut o sferdé cëses. “Nchinamo fovel de bujën de na dumanda per na cunzescion, śën bastel na comunicazion al Ufize provinziel per nuzé eghes y i lëures possa riesc unì scumencei” spiega l assessëur Laimer. Cun chësta scemplificazion devëntel nce plu saurì a se nuzé de energies alternatives sciche la geotermia.
as
