Atualità
L Museum dla Natura unerea Darwin per n’ena
USP – L cumplì di ani dl scuvridëur che à fat mudé l mond, ie ucajion per n’ena de manifestazions tl Museum dla natura a Bulsan. Cun na cunferënza scumëncia l’ena de Darwin duman, vënderdi 05 de fauré y jirà pona inant cun na festa per mëndri n juebia grassa y n cabaret per duc ntan l fin dl’ena. La scumenciadives per lecurdé Darwin ie unides prejentedes ncuei (4 fauré) a Bulsan.
Cun l “Di de Darwin” vëniel lecurdà n scienziat de gran valor che fova nasciù ai 12 de fauré 1809 a Shrewsbury tl Nghiltiera. L Museum dla natura a Bulsan dedichea bele per l cuinto iede n’ena de scumenciadives a chësc cumplì di ani.
La cunferënzes da sëira scumëncia dutes dala 20.00 y la ntreda ie daniëura debant: n vënderdi ai 5 se rejona Friedeman Schrenk de scuviertes n cont dla persona moderna.
N lunesc ai 8 de fauré rejona Conradin A. Burga dl Madagaskar. L prufessëur de geografia purterà dant dl pericul che manacia la cuarta majera ijula dl mont cun si truepa plantes y tieres.
Na udleda ai cudejiei de Darwin puderan fé pra la cunferënza n merdi ai 9 de fauré. L prufessëur Telmo Pievani rujenerà dla revoluzion scientifica nasciuda da chisc cudejiei.
N mierculdi ai 10 de fauré prejënta l prufessëur Bernd Gänsbacher si liber nuef te chël che l spiega la rujeneda di Gene.
A „Darwin & Evolution“ ie dedicheda la festa da carnescià per mëndri y families n juebia grassa, 11 de fauré. Cun juesc y crafons uniral festejà dala doi ala cinch domesdì. La plu bela mascres unirà premiedes.
N sada sëira, 13 de fauré vëniel pità n cabaret dal titul “Die Krone der Erschöpfung” te chël che l duo de cabaretisć svizeri porta lum sun l’evoluzion dla persona.
La mostra speziela „®Evolution“ resterà da udëi nchin ai 5 de setëmber. Dan la cunferënzes dl 5, 9 y 10 de fauré vëniel pità na vijita meneda per mparé a cunëscer miec l’evoluzion.
Nfurmazions plu avisa sun la scumenciadives tl Museum dla natura, streda Binder 1 a Bulsan giaten al numer de telefonn 0471 412964 o nce tl internet sota www.naturmuseum.it.
as
